Staff Member

Member
Staff member
Ahl-e-Bait se mohabbat (khulasa-e-dars)

By: Shaikh Abu Kaleem Faizi Hafizahullah

Romanised By: Umar Asari

Hazrat Zaid bin Arqam Radhiallahu Anhu se riwayat hai ke ek din Rasoolullah ﷺ hamein Makkah aur Madinah ke darmiyaan Khum naami ek chashme par khutbah dene khade huwe, sab se pehle Aap ne Allah ﷻ ki hamd-o-sana bayan ki aur wa’z-o-naseehat ki phir farmaaya: Amma Ba’d! Suno aye logon! Main bhi ek bashar (insaan) hun, qareeb hai ke mere Rabb ka qaasid [Malak-ul-Maut] mere paas aaye aur main us ki da’wat qabool kar lun [yani meri wafaat ho jaaye] main tumhaare paas do bhaari cheezein [nihayat azeem aur ahem cheezein] chhod raha hun, un mein se pehli cheez kitaab-e-ilaahi hai jis mein hidaayat aur roshni hai, is liye tum Allah ﷻ ki kitaab ko lo aur use mazbooti se thaam lo, chunanche Aap ﷺ ne Allah ki kitaab ki targheeb di aur us ke mutabiq amal par ubhaara, phir farmaaya: [Doosri azeem cheez] mere Ahl-e-Bait hain, main tumhein Ahl-e-Bait ke baare mein Allah ﷻ ki yaad dihaani karaata hun, main tumhein apne Ahl-e-Bait ke baare mein Allah ﷻ ki yaad dihaani karaata hun, main tumhein apne Ahl-e-Bait ke baare mein Allah ﷻ ki yaad dihaani karaata hun.
{Sahih Muslim: 2408, Musnad Ahmad: 19265}

Tashreeh: Nabi-e-Kareem ﷺ Hajjat-ul-Wadaa’ se waapas ho rahe the ke Rabigh ke paas Khum naami ek chashme par qiyaam farmaaya, choonki Arafah ke maidaan mein yeh Aayat naazil ho chuki thi “Aaj main ne tumhare liye deen ko kaamil kar diya aur tum par apna in’aam bharpoor kar diya aur tumhare liye Islam ke deen hone par razamand ho gaya” Is liye Aap ﷺ ko mehsoos huwa ke ab Aap ki maut qareeb hai aur bahut mumkin hai ke jald hi Allah ﷻ ki taraf se bulaawa aa jaaye aur main is duniya se rukhsat ho jaaun, is liye Sahaba-e-Kiraam ke us azeem ijtimaa’ ko ghanimat samjhte huwe unhein chand naseehati kalmaat se nawaaza, min-jumla (kul mila kar) un naseehati kalmaat ki do ahem baatein is Hadees mein bayan hui hain.
➊ Kitaab-e-ilaahi ka ihtimaam:
Aap ﷺ ne Sahaba-e-Kiraam ko pehle to is kitaab ki ahmiyat batlaayi ke yeh kitaab saraapa hidaayat aur roshni hai, jis tarah agar koyi shakhs saaf aur seedhe raaste par chal raha hai aur use kaafi roshni bhi mil rahi hai to woh na bhatkega aur na hi thokar khaayega, isi tarah kitaab-e-ilaahi ko apne liye hidaayat ki kitaab samajhne waala aur use mash’al-e-raah bana kar amali maidaan mein utarne waala shakhs kabhi bhi gumraah na hoga isi liye Aap ﷺ ne is kitaab ko mazbooti se thaame rahne aur us se jude rehne ka hukm diya aur us ke mutabiq amal karne par ubhaara.

➋ Ahl-e-Bait ki ri’aayat:
Choonki Aap ﷺ apne peeche ilmi meeraas ke alawah koyi maaddi meeraas chhod kar nahi jaa rahe the aur Aap ke peeche Aap ke ahl-o-ayaal ka ek bada silsila tha is liye un ke huqooq ke baare mein bhi Sahaba ko mutanabbeh kiya ke un ke huqooq ka khusoosi khayaal rakhna, un ka ehtraam karna, un se mohabbat rakhna, un ki achchi ri’aayat karna aur har woh cheez jis se unhein takleef ho us se bachna.

Aap ﷺ ki isi naseehat par amal karte huwe Hazrat Abu Bakr Radhiallahu Anhu ne bhi farmaaya tha “Us zaat ki qasam jis ke haath mein meri jaan hai mere nazdeek Allah ke Rasool ﷺ ke ahl-e-qarabat ke saath husn-e-sulook karna mere apne ahl-e-qarabat ke saath husn-e-sulook se ziyadah mehboob hai.”
{Sahih-ul-Bukhari: 3712}

Is Hadees mein Quran-e-Kareem aur Ahl-e-Bait ko “Thaqalain” yani do bhaari cheezon se ta’beer kiya gaya hai jis ka matlab hai ke un par amal karna, un ke huqooq ka paas-o-lihaaz rakhna aur un ke baare mein sahih hadd par baaqi rehna bhaari aur mushkil kaam hai, jaisa ke aaj is ka mushaahadah hai ke Quran-e-Kareem aur Ahl-e-Bait ke baare mein log ifraat-o-tafreet aur ghulu ke shikaar hain.
Wazeh rahe ke is Hadees mein Ahl-e-Bait se muraad us mafhoom se bahut aam hai jo shia hazraat lete hain aur Ahl-e-Sunnat Wal-Jama’at ke nazdeek un ke huqooq ki ri’aayat ka mafhoom bhi shia hazraat ke mafhoom se mukhtalif hai chunanche Ahl-e-Tashayyu’ Ahl-e-Bait se muraad sirf aulaad-e-Fatima ko lete hain jab ke Ahl-e-Sunnat Wal-Jama’at ke nazdeek Ahl-e-Bait mein pehla darja azwaaj-e-mutahharaat ko haasil hai aur Quraish ke khaandaan ka har woh fard daakhil hai jis par sadqa haraam hai jaisa ke is Hadees ke aakhir mein is ki saraahat maujood hai ke Rawi-e-Hadees Hazrat Hussain ne Hazrat Zaid bin Arqam Radhiallahu Anhu se sawaal kiya ke Aap ke Ahl-e-Bait kaun hain? Kya Aap ki azwaaj-e-mutahharaat aap ke Ahl-e-Bait mein se nahi hain? Hazrat Zaid Radhiallahu Anhu ne jawaab diya yaqeenan Aap ﷺ ki biwiyaan aap ke Ahl-e-Bait mein se hain, lekin yahan is se muraad Aap ke woh Ahl-e-Bait hain jin par Aap ke baad sadqa haraam hai, jaise Aal-e-Ali, Aal-e-Aqeel, Aal-e-Ja’far aur Aal-e-Abbas.
Isi tarah un ke huqooq ki ri’aayat ka yeh matlab nahi hai ke unhein ma’soom maana jaaye, un ki shaan mein ifraat-o-ghulu se kaam liya jaaye jaisa ke Ahl-e-Tashayyu’ ka rawayyah hai balki un ke saare deen ki bunyaad hi ifraat-o-ghulu aur Aimaa-e-Ahl-e-Bait ki ma’soomiyat par hai halaanki Ahl-e-Bait se mohabbat-o-ta’zeem ka matlab un ki seerat-o-kirdaar ke roshan nuqoosh ko apnaana aur un ki saalihiyyat aur taqwa-e-ilaahi ki wajah se un ki mohabbat-o-azmat ko apne dil main rakhna, un ki ta’zeem karna hai balki taqreeban woh saare kaam hain jo Nabi-e-Kareem ﷺ ki ta’zeem-o-takreem mein daakhil hain, jaisa ke Hazrat Abu Bakr Radhiallahu Anhu ne farmaaya: Tum log Muhammed ﷺ ka un ke Ahl-e-Bait ke baare mein khayaal rakho.
{Sahih-ul-Bukhari: 3751}

Fawaid: Allah ke Rasool ﷺ bhi ek insaan hain, aur tamaam insaanon ki tarah Aap par bhi maut aayi hai.
Quran-e-Majeed ke saath tamassuk (means Quran ko mazbooti se pakadna) hi gumraahi se najaat hai.
Ahl-e-Bait ke baare mein Ahl-e-Sunnat Wal-Jama’at ka tasawwur Ahl-e-Tashayyu’ se mukhtalif hai.
Nabi-e-Kareem ﷺ ki azwaaj-e-mutahharaat ki tauheen Nabi ﷺ ki mohabbat ke mukhalif hai.
 
Last edited by a moderator:
Thread starter Similar threads Forum Replies Date
Israr Hussain Al-Wahhabi Emaan 0
Staff Member Emaan 0
Staff Member Emaan 0

Similar threads


Top