Chand Shubhaat Aur Nazriyaat Hindustaan Ke Maujoodah Halaat Ke Tanazoor Me.

[Maqubool Ahmad Salafi]

Chand Shubhaat Aur Nazriyaat Hindustaan Ke Maujoodah Halaat Ke Tanazoor Me.

Sheikh Maqbool Ahmad Salafi Hafizahullaah
Islamic Da'wah Centre, Shumaali Taif KSA
Romanised By: Khadija Muhammadi​

Chand Dino Se Hindustaani Awaam Jis Tarah Be Chaini Ka Shikaar Hai Uski Misaal Shayad Angrez Daur Me Hi Mil Paae Gi,Us Se Pehle Muslim Hukmarano Ne Shayad Islaam Ke Liye Kuch Kiya Ho Ya Na Kiya Ho Magar Yaha Ke Tamaam Tabqaat Ke Liye Adal Aur Insaaf Se Le Kar Huqooq Aur Mara'at Ki Mukammal Paasdaari Zaroor Ki Hai,Yahi Wajah Hai Ke Taqreeban 800 Year Musalmaano Ki Hukoomat Rehte Hue Bhi Hamari Tadad 14 Ya 15% Hai Jab Ke BJP Iqtidaar Sambhalne Ke Baad Se Hi RSS Ke Sath Mil Kar Apni Tadaad Kam Karne Ke Mansube Par Amal Kar Rahi Hai. Ham Musalmano Ke Liye Yah Issue Fikar Mandi Ka Itna Baais Nahi Hai Jitna Ke Hame Muttahid Hona Aur Shirk Aur Bid'at Se Taubah Kar Ke Khaalis Deen E Haneef Par Jama Hona Hai.
Is Mamoon Ke Zariya Musalmano Ke Kuch Nazriyaat Aur Shubhaat Ki Haqeeqat Tatolna Chahta Hu Is Wajah Se Hindustaan Ke Mukhtalif Soorate Haal Ya Maujoodah Soorate Haal Par Hinduo Ke Nazriyaat Se Sirf Nazar Karta Hu.
Sab Se Pehle Islaami Nuqtae Nazar Se Jumhoori Mulk Me Ahtijaaj Ki Sharai Haisiyat Par Musalmaano Ke Darmiyan Jawaaz Aur Adam E Jawaaz Par Apni Baat Rakhna Chahta Hu Ke Bila Shubah Muzahire Haraam Hai,Is Baat Ki Wazaahat Ke Saath Ke Jo Ulma Qura'an Aur Hadees Se Is Ke Jawaaz Ki Daleel Paish Karte Hai Unka Istidlaal Galat Hai. Ab Me Khaalis Siyasi Pase Manzar Me Baat Kar Raha Hu Aur Siyasat Me Mufeed Maslihat Malhuz Rakh Sakte Hai. Ham Sabhi Jante Hai Ke Jamhuriyat Me Aksariyat K8 Raae Se Zalimana Qanoon Bhi Paas Kiya Ja Sakta Hai Iski Rok Tham Ke Liye Jamhuri Dastoor Me Hi Poor Aman Muzahire Ko Qanooni Jawaaz Haasil Hai. Mulk Me Jab CAB Laane Ki Baat Hui To Shuru Me Aksar Logo Ki Raae Thi Ke Yah Aywaan Hukoomat Se Paas Nahi Ho Paae Gi Kun Ki Yah Tamaam Hindustaaniyo Ke Liye Nuqsaan Dene Wali Hai Magar Fir Bhi Dono Aywaano Se Paas Ho Kar Act Ki Shakal Ikhtiyaar Kar Li. Hind Me Zulam Ke Khilaaf Aawaaz Buland Karne Ka Ek Zariya Court Me Muqaddama Darj Karna Bhi Hai Magar Maujoodah Court,Vakeel, Police,Riporter Sab BJP Ki Muththi Me Hai Ham Ne Babri Masjeed Ka Faisla Bhi Dekha Jo Supreme Court Se Aaya Uske Liye Ham Ne Muzahire Nahi Kiye The Court Par Inhisaar Kiye The,Faisla Par Nazre Saani Ke Liye Dubarah Court Me Arzi Paish Ki Gai Jise Yak Lakhat Khaarij Kar Di Gai. Aysi Soorate Haal Me Zalimana Qanoon CAB Ki Rockthaam Ke Liye Pur Aman Muzahiro Ke Alaawah Koi Rasta Nazar Nahi Aata Hai. Me Kehna Chahta Hu Ke Yah Muzaahire Maujoodah Soorate Haal Me Jaaiz Hi Nahi Ham Sab Ki Awwaleen Zaroorat Hai,Barwaqt Unhe Apne Tamaam Kaam Kaaj Par Tarjeeh Dena Chaahiye. Kya Aap Ko Maloom Nahi Ke Angrezo Ki Gulaami Se Aazaadi Dilaane Me Ulma Sare Fehrist Rahe Hai Aur Unhone Mulk Bhar Me Muzaahire Kiye,Un Me Se Kisi Ne Bhi Ikhtilaaf Nahi Kiya Siwaae Angrezi Gulaam Aur Munaafiq Ke. Is Me Mazeed Ek Baat Ka Izaafa Karta Chalu Ke Jo Log Is Bill Ki Himaayat Me Hai Unke Saath Hamara Ravaiyya Kaisa Hona Chahiye,Is Babat Mera Yah Kehna Hai Ke Hame Un Se Ta'aruz Karne Ki Zaroorat Nahi Hai,Mulk Ki Aksariyat Mukhalifat Me Khadi Hai Ham Aksariyat Ke Saath Mil Kar Adliya Aur Hukoomat Par Dabaao Bana Sakte Hai. Rahi Baat Aurto Ka Muzaahiro Me Hissa Lena Jab Ke Unhe Apne Gharo Me Istiqraar Ka Hukam Diya Gaya Hai To Me Samjhta Hu Yaha Aurat Aur Mard Sab Ki Jaan Aur Maal Ko Khatraah Hai,Agar Aurat Ka Isme Hissa Lena Mufeed Hai To Woh Bhi Hissa Le Sakti Hai Jaisa Ke Use Bhi Apne Jaan Aur Maal Ke Liye Difa'a Ka Haq Hai Taaham Sharai Hudood Malhooz Rakhna Chaahiye Maslan Pardah Aur Ikhtilaat Ke Mutalliq.
Ab Me Baat Karna Chahata Hu NRC Ki,Kai Ulma Ne Bayan Diya Hai Ke NRC Qura'an Se Saabit Hai,Me Un Ulma Se Basad Ahtiraam Guzaarish Karna Chahta Hu Ki Aap Apne Is Mauqaf Par Nazre Saani Ki Zehmat Farmaae. Ek Taraf Aap Hi Kehte Hai Balki Pura Mulk Keh Raha Hai Ki NRC Musalmaano Ke Khilaaf Nahi Balki Pure Hindustaan Ke Khilaaf Hai Fir Tazaad Bayani Kuy? Kahi Aap Ki Yah Baat Kattar Hindu Pasand Ko Na Ma'loom Ho Jaae To Jis Tarah Pehle Kehta Raha Ke Modi Ko Allaah Ne Bheja Hai Ab Yah Bhi Kahe Ga Ki Tum Jab Qabool Karte Ho NRC Qur'aan Se Saabit Hai Fir Uski Mukhaalifat Kuy Karte Ho,Chup Chaap Mulk Se Nikal Jaao. Diqqat Nazri Se Masala Ko Samjhne Ki Zaroorat Hai Ke Qura'an Me Kya Kaha Gaya Hai,Kis Pase Manzar Me Kaha Gaya Hai Aur Kon Mukhaatib Hai?
Surah Ibraahim Me Allaah Ne Zikar Kiya Hai Ke Kaafiro Ne Apne Rasoolo Se Kaha Ke Ham Tumhe Mulk Badar Kar Denge Ya Fir Hamara Deen Qabool Kar Lo Aur Dusre Muqaamat Par Kuch Qaumo Ka Bhi Zikar Hai Jinhone Apni Qaum Ke Nabi Aur Un Par Imaan Laane Walo Ko Mulk Badar Karne Ki Dhamki Di Maslan Qaume Shuaib,Qaume Loot Aur Mushrikeen E Makka. Mera Sawaal He Ke Kya NRC Ka Yahi Pase Manzar Aur Matlab Hai Jo Matlab Mazkoorah Aayat Me Hai?Kya Hindustaan Ke Kaafiro Ne Yah Hukame Nama Jaari Kiya Hai Ke Tum Musalmaan Hindustaan Se Nikal Jaao Ya Hindu Mazhab Qabool Kar Lo?Bilkul Aysi Baat Nahi Hai.
Pehle Yah To Dekhe Ke Hindustaan Me Kis Qisam Ke Musalmaano Ki Aksariyat Hai,Dehli Me Soofi Conference Karne Wale Modi Ke Sath Mil Kar Conference Karte Hai Kya Yah Log Aayat Ke Misdaaq Ho Sakte Hai? Dusri Baat Yah Ke Lafz NRC Mulk Ke Tamam Bashindo Ko Shaamil Hai,Is Se Sirf Musalmaan Muraad Nahi Hai,Is Wajah Se NRC Ki Daleel Qur'aan Se Nikaalna Na Sirf Ijtihaadi Galati Hau Balke Dushman Ke Liye Propaganda Ka Rasata Bhi Hamvaar Karna Hai.
Is Se Mutalliq Aakhri Baat Kehna Chahta Hu Ke Bhaarat Se Musalmaano Ko Nikaal Diya Jaae Ya Un Sab Ko Qatal Kar Diya Jaae,Us Baat Se Haqeeqi Musalmaan Kabhi Nahi Khauf Khaae Ga Kun Ki Un Dono Soorto Me Allaah Ki Taraf Se Hamare Liye Inaam Hai Haqeeqi Mo'amin Ko Uski Zameen Se Nikala Jaae To Allaah Unhe Unki Sarzameen Me Waapis Bulaata Hai Jaisa Ke Nabi SAV Aur Ashaabe Rasool SAV Ke Saath Hua Aur Agar Qatal Kar Diya Jaae To Woh Islaam Ke Liye Qatal Hone Par Shaheed Kehlaae Ga Lekin Yaad Rahe Shirk Karne Wala Maqtool Shaheed Nahi Hoga,Is Liye Shuru Me Kaha Hu Ke Hindutwao Ka Muslim Mukhaalif Ejanda Itna Fikar Mandi Ka Baais Nahi Hai Jitna Ke Ham Musalmaano Ka Aqeedah E Tauheed Par Ek Jagah Jama Hona Hai.
Ek Masala Mere Saath Yah Paish Aaya Ke Ek Sahab Ne Mere Group Islaamiyaat Me Likha Ke Yah Khaalis Islaami Group Hai Fir Bhi Hindustaani Masaail Par Koi Baat Cheet Nahi Hai,Ulma Khaamosh Hai,Kya Musalmaan Mar Jaaenge To RSS Ke Gundo Ko Masaail Bataae Jaaen Ge?
Garcha Jumlo Ka Intikhaab Sahih Nahi He Taaham Woh Maujoodah Soorate Haal Par Ulma Ki Khaamoshi Se Shadeed Nala Nazar Aate Hai, Mene Unhe Jawab Diya Ke Yaha Masale Masaail Ki Zaroorat Nahi Balke Zaalimana Qaanoon (CAB,NRC,NPR)Ke Khilaaf Aawaaz Buland Karne Ki Zaroorat Hai Aur Yah Baat Bhi Sahih Hai Ke Mulk Ke Muslim Tabaqaat Ke Deeni Rehnuma,Ulma Aur Talaba Par Jamood Taari Hai,Kuch Hai To Bas Laffazi,Lachchedaar Taqreer Ya Seminar Jab Ke Abhi Watan Ko Hamare Jisam Aur Jaa Ki Zaroorat Hai Jaise Angrezo Se Aazaadi Ke Liye Hamaare Baab Dada Ne Qurbaani Di.
Hindustaani Soorate Haal Ke Tanaazur Me Social Media Par Sarhad Paar Se Kuch Hawaae Galat Simat Chalti Nazar Aa Rahi Hai,Yah Hawaai Udaane Wale Kuch Khood Ko Muwahhid Kehne Wale Bhi Hai. Bahut Saare Sarhadi Gunche Is Baat Par Khil Rahe Hai Ke Qaaide Aazam RH Ka Do Qaumi Nazariya Sach Hota Dikhaai De Raha Hai. Me Dusre Par Kam, Muwahhid Kehne Walo Par Ziyadah Hairaan Hu Ke Kis Tarah Ek Gaali Shi'a Ko Uske Naam Se Nahi Balke Qaaide Aazam Se Pukara Jata Hai Aur RH Ke Zariya Dua Di Jaati Hai. Dusri Taraf Hind Ke Aalam E Deen, Mufassire Qur'aan Molana Abul Kalaam Aazaad Ka Nazariya Adam Taqseem Ka Hai. Ek Muwahhid Kis Ko Tarjeeh Dega?
Sarhadi Bhai Hame Qisam Qisam Ke Ta'ne De Rahe Hai Unka Zikar Fuzool Hai,Asal Masale Ki Wazaahat Kaafi He,Ek Masala Hindustaan Se Musalmano Ki Muhabbat Par Sawaal Uthana Aur Dusra Masala Hinduo Ka Mulk Keh Kar Hame Yaha Se Hijrat Kar Jaane Ka Mashwirah Dena Hai. Mulk Se Muhabbat Par Sawaal Uthana Jahalat Aur Na Waqfiyat Ki Daleel Hai,Watan Se Muhabbat Aur Uske Izhaar Me Qatai Koi Harj Nahi Hai Aur Hijrat Karne Ka Mashwarah Dene Walo Ko Pehle Apne Ahwaal Sahih Karna Chahiye, Hamaare Liye Abhi Hijrat Ka Waqt Nahi Aaya Hai Jab Islaami Ahkaam Par Amal Karne Se Hame Rok Diya Jaae Ga Fir Yah Masala Aae Ga Qata E Nazar Us Se Ke Sarhad Paar Ke Wazeer E Aazam Musalmaan Muhaajir Ko Inkaar Kar Diya Hai. Yaa Lil Ajab.
Sab Ko Maloom Hai Ke Hind Ke Haalat Paak Se Mukhtalif Hai Fir Bhi Paak Me But Parast Aaraam Se Hai, Unse Koi Bair Se Nahi,Qaadiyaniyo Ko Ek Bade City Rabavah Me Panaah Di Gai Hai Jaha Unko Apni Dawat Ki Nashro Ishaat Ke Liye Aakhbaarat Aur Channel Se Le Kar Har Qisam Ka Platform Muhaiyya Hai,Salana Ijlaas Is Qadar Aham Hota Hai Ke Puri Duniya Se Qaadiyani Isme Shareek Hote Hai Aur Fir Isaai Aur Shi'a Hukoomat Ke Bade Bade Ohdo Par Faaiz Hai Jo Na Sirf Paak Ke Liye Khatarnaak Hai Balke Deen E Islaam Ko Bhi Nuqsaan Pohncha Rahe Hai,You Tube Par Senkdo Video's Mil Jaae Gi Jis Me Shi'a Allaah,Rasool, Ummahaatul Moamineen, Sahaba Aur Islaam Ka Mazaaq Udate Nazar Aate Hai Aakhir Unko Muslim Mulk Me Is Qadar Jhooth Kaise ?
Sarhad Paar Se Ek Aur Sahab Mile Jo Mere Mazmoon Me Waarid Ek Misra'a Par Itiraaz Karne Lage,Mashhoor Sh'ar Ka Ek Misra'a Hai.
HINDI HAI WATAN HAI HINDUSTAAN HAMARA,,
Is Par Unhone Mujh Par Wus'at Nazri Paida Karne Ki Nasihat Ki Aur Kuch Aatiraaz Kiye Magar Laa Jawaab Thehare. Is Misra'a Pat Unhone Kaha:
MULIM HAI WATAN HAI SARA JAHAN HAMARA.
Me Unse Basadde Ahtiraam Arz Kiya Ke Agar Aap Se Koi Puche Kis Mulk Ke Bashinde Hai To Kya Jawaab Hoga?Sahab Ki Taraf Se Abhi Tak Koi Jawaab Nahi Aaya.
Kahir Mene Ikhtisaar Se Likhne Ko Socha Tha Magar Mazmoon Kuch Lamba Ho Gaya,Is Mazmoon Se Ikhtilaaf Kiya Jaa Sakta Hai Magar Saleeqa Ikhtilaaf Malhooz E Khaatir Rehna Chaahiye.