1. This site uses cookies. By continuing to use this site, you are agreeing to our use of cookies. Learn More.
  2. Assalamu Alaikum Warehmatullahi Wabarakatuhu Islaah e Ummat Forum Mein Aapka Isteqbaal Hai. Agar Aap Pehli Baar Forum Par Aaye Hain To Register Zaroor Karen Taaki Aap Forum Se Ziyadah Se Ziyadah Faida Utha Saken. Baghair Register Huwe Aap Islaah e Ummat Forum Par Posting Nahi Kar Sakenge. Is Liye Register Kar Ke Apna Account Bana Len Jo Ki Bilkul Free Hai. Registration Ka Tareeqa. Register Hone Ke Baad Aap Ko Aik Confirmation Email Aapki Us Email ID Par Bheji Jaayegi Jis Ko Aapne Account Banate Waqt Daala Tha. Kabhi Confirmation Email Aapko Milne Mein Thodi Late Bhi Ho Sakti Hai. Aap Ke Inbox Ya Phir Aap Ke Junk Mail Ya Spam Box Mein Yeh Confirmation Email Milega. Koi diqqat ho to hamein MAIL karen.

Muharram ul Haraam Aur Ashoora Ka Roza

Discussion in 'Roza' started by Umar Asari, Nov 1, 2016.

  1. Umar Asari

    Umar Asari Active Member Staff Member

    Joined:
    Oct 30, 2016
    Messages:
    1,030
    Likes Received:
    2,719
    Trophy Points:
    96
    Gender:
    Male
    Occupation:
    Student
    Location:
    New Delhi, India
    بِسْمِ اللَّهِ الرَّحْمَٰنِ الرَّحِيمِ
    Muharram ul Haraam Aur Ashoora Ka Roza

    Tehreer: Shaikh Maqbool Ahmad Salafi Hafizahullah

    Romanised By: Umar Asari

    Allah Taala ne shuru hi se chaar (4) maheeno ko hurmat wala qarar diya hai woh hain. Zul-Qa’da, Zul-Hijjah, Muharram aur Rajab. Allah Taala ka farmaan hai:

    إِنَّ عِدَّةَ الشُّهُورِ عِنْدَ اللَّهِ اثْنَا عَشَرَ شَهْرًا فِي كِتَابِ اللَّهِ يَوْمَ خَلَقَ السَّمَاوَاتِ وَالْأَرْضَ مِنْهَا أَرْبَعَةٌ حُرُمٌ ۚ ذَٰلِكَ الدِّينُ الْقَيِّمُ ۚ فَلَا تَظْلِمُوا فِيهِنَّ أَنْفُسَكُمْ ۚ وَقَاتِلُوا الْمُشْرِكِينَ كَافَّةً كَمَا يُقَاتِلُونَكُمْ كَافَّةً ۚ وَاعْلَمُوا أَنَّ اللَّهَ مَعَ الْمُتَّقِين
    Tarjumah: Maheeno ki ginti Allah ke nazdeek kitab ul Allah (Allah ki kitaab) mein baara (12) ki hai, usi din se jab se aasman o zameen ko us ne paida kiya hai un mein se char (4) hurmat o adab ke hain. Yahi durust deen hai, tum in maheeno mein apni janon par zulm na karo aur tum tamam mushrikon se jihad karo jaise ki woh tum sab se ladte hain aur jaan rakho ki Allah Taala muttaqiyon ke saath hai.
    (Surah At-Taubah, Surah No: 9 Ayat No: 36)

    Fi kitaabiAllah «فِي كِتَابِ اللَّهِ» se murad Lauh e Mehfooz yani taqdeer e ilahi hai. Yani shuru se hi Allah Taala ne baara (12) maheenay muqarrar farmaye hain jin mein chaar (4) hurmat wale hain jin mein qatl o jidaal khaas taur se mana hai. Isi baat ko Nabi Kareem Sallallahu Alaihi Wasallam ne is tarah farmaya hai:

    الزَّمَانُ قَدِ اسْتَدَارَ كَهَيْئَتِهِ يَوْمَ خَلَقَ السَّمَوَاتِ وَالأَرْضَ، السَّنَةُ اثْنَا عَشَرَ شَهْرًا، مِنْهَا أَرْبَعَةٌ حُرُمٌ، ثَلاَثَةٌ مُتَوَالِيَاتٌ ذُو الْقَعْدَةِ وَذُو الْحِجَّةِ وَالْمُحَرَّمُ، وَرَجَبُ مُضَرَ الَّذِي بَيْنَ جُمَادَى وَشَعْبَانَ
    Tarjumah: Zamana ghoom phir kar usi haalat par aa gaya jaise us din tha jis din Allah Taala ne aasman aur zameen ko paida kiya tha. Saal baara (12) maheeno ka hota hai, chaar (4) maheenay us mein hurmat waale hain. Teen (3) to pe dar pe (lagaatar, continously). Zu-Qa’da, Zul-Hijjah aur Muharram aur choutha (4th) Rajab e Mudhar jo Jumad al Ukhra aur Sha’baan ke beech mein padta hai. (Sahih Bukhari: 3197, 4662 and Sahih Muslim: 1679)

    Zamana usi haalat par aa gaya hai ka matlab, Arab ke mushrikeen maheeno mein jo taqdeem o takheer (aagey peechey) karte they us ka khatma ho gaya.

    (Tafseer Ahsan ul bayan)

    Adab o ehtram ki wajah se is Mahinay ko Muharram kaha jaata hai. Is mein jang o jidaal, fitna aur fasaad, zulm, ladaai jhagda karna khaas taur se mana hai. Is mumani’at (prohibition) ka lihaaz Jahiliyyat ke zamaane se balki kaynaat (universe) ki takhleeq se chala aa raha hai. Yeh maheena hurmat waale maheenay mein sab se afzal hai.

    Muharram ul Haram aur Bid’aat Ka Toofaan:
    Yeh maheena adab o ehtram wala hai is ke bawjood soofiyon aur bi’atiyon ne is maheenay mein soog mananay (maatam karne) aur khaane peene ke bahut saare gumraah raste ijaad kar liye. Hussain Radhiallahu Anhu ki shahadat ka maatam, taziyah ke naam par azaadari (mourning), nauha wizari (roona peetna), qawwali aur marsiyyah (threnodes, elegy), deegein aur sabelein, nahoosat o izaa ka izhaar, shuhadaa (martyrs) ki nazr o niyaaz, jism zakhmi karna, aurton aur mardon ka ikhtelaat (mixing) aur naach gaanay, dhol tamashey waghera saare kaam nai (new) ijaad aur bid’aat ki qism mein se hain aur yeh sab jahannum tak le jaaney waale hain. Is liye musalmanon ko chahiye ke ehtram waale maheenay ka ehtram kare jis tarah ahl e zamana ne kiya hai. Allah ke hudood ki pamali se azaab aata hai. Allah Taala Ummat e Musalmah ko deen ki sahih samajh de kahin aisa na ho ki in bid’aat ke irtikaab se Allah ummat par azaab nazil kar de. Allah hamein mehfooz rakhe. Aameen

    Is maheenay ke kai fazail hain yahan sirf aik ahem fazeelat ka zikr kiya jaa raha hai woh hai Muharram mein roza rakhna khaas taur se Aashoora ka.

    Muharram ul Haraam aur Aashoora ke rozay:
    (1) Muharram ke aksar rozay ki fazeelat:

    Muharram ke maheenay mein poore maheenay ka roza rakhna jaayez hai aur kuch fuqaha ne zikr bhi kya hai ki poore Muharram ka roza rakhna chahiye, magar Nabi Sallallahu Alaihi Wasallam se Ramadhan ke alawah kisi maheenay mein mukammal roza rakhna saabit nahi hai. Ramadhan ke alawah sirf Sha’baan mein aksar din ka roza rakhtey they.

    Is liye tamam dalail ko saamney rakhte huwe yeh kaha jayega ki hadees:

    عَنْ أَبِي هُرَيْرَةَ، - رضى الله عنه - قَالَ قَالَ رَسُولُ اللَّهِ صلى الله عليه وسلم ‏ "‏ أَفْضَلُ الصِّيَامِ بَعْدَ رَمَضَانَ شَهْرُ اللَّهِ الْمُحَرَّمُ وَأَفْضَلُ الصَّلاَةِ بَعْدَ الْفَرِيضَةِ صَلاَةُ اللَّيْلِ ‏"‏
    Tarjumah: Abu Hurairah Radhiallahu Anhu kehte hain ki Nabi Sallallahu Alaihi Wasallam ne farmaya: Ramadhan ke baad sab se afzal rozay Allah ke maheenay “Muharram” ke hain aur farz namaz ke baad sab se afzal namaz raat ki namaz hai.
    (Sahih Muslim: 1163)

    Muharram ke ziyadah rozay rakhnay par Mahmool ki jayegi na ke pooray Muharram ke rozay par.

    * Shaikh Ibn e Baaz Rahimahullah ne is Hadees se Muharram ke ibtidayi (starting ke) dus (10) rozay murad liye hain.

    * Shaikh Mohammad Saleh al Uthaimeen Rahimahullah se poocha gaya ki kya pooray Muharram ka roza rakhnay wala Bid’ati kehlayega? To aap ne kaha nahi, lekin Nabi Sallallahu Alaihi Wasallam se Ramadhan ke alawah kisi maheenay ka mukammal roza rakhna saabit nahi hai aur Sha’baan ka aksar roza rakhtay they. (Kalaam ka ikhtisaar)

    * Shaikh Mohammad Saleh al Munajjid farmate hain ke Nabi Sallallahu Alaihi Wasallam se Ramadhan ke alawah kisi maheenay mein mukammal roza rakhna saabit nahi hai, lehaza (isliye) yeh Hadees Muharram mein kasrat se roza rakhney pay Mahmool hogi na ki poore maheenay par.

    (2) Sirf Dasven (10th) Muharram ke rozay ki fazeelat:
    Nabi Sallallahu Alaihi Wasallam ne dasven (10th) Muharram ka roza rakha hai, Aap ne is rozay ka bada ajr zikr farmaya hai:
    وَصِيَامُ يَوْمِ عَاشُورَاءَ أَحْتَسِبُ عَلَى اللَّهِ أَنْ يُكَفِّرَ السَّنَةَ الَّتِي قَبْلَهُ
    Tarjumah: Aur Aashoora ke din ka roza, main Allah se ummed rakhta hun ki pichle saal ke gunaaho ka kaffara ban jayega.
    (Sahih Muslim: 1162)

    Hazrat Ibn e Abbas Radhiallahu Anhuma bayan karte hain:

    مَا رَأَيْتُ النَّبِيَّ صلى الله عليه وسلم يَتَحَرَّى صِيَامَ يَوْمٍ فَضَّلَهُ عَلَى غَيْرِهِ، إِلاَّ هَذَا الْيَوْمَ يَوْمَ عَاشُورَاءَ وَهَذَا الشَّهْرَ‏.‏ يَعْنِي شَهْرَ رَمَضَانَ‏.‏
    Tarjumah: Main ne Nabi Sallallahu Alaihi Wasallam ko siwaye Aashoora ke din ke aur is Ramadhan ke maheeney ke aur kisi din ko doosre dino se afzal jaan kar khaas taur se qasd (irada) kar ke roza rakhte nahi dekha.
    (Sahih Bukhari: 2006)

    Is liye Nabi Sallallahu Alaihi Wasallam ne khud bhi dasven (10th) Muharram ka roza rakha aur dosron ko bhi is ki takeed ki.

    عَنْ عَائِشَةَ ـ رضى الله عنها ـ قَالَتْ كَانَ يَوْمُ عَاشُورَاءَ تَصُومُهُ قُرَيْشٌ فِي الْجَاهِلِيَّةِ، وَكَانَ رَسُولُ اللَّهِ صلى الله عليه وسلم يَصُومُهُ، فَلَمَّا قَدِمَ الْمَدِينَةَ صَامَهُ، وَأَمَرَ بِصِيَامِهِ، فَلَمَّا فُرِضَ رَمَضَانُ تَرَكَ يَوْمَ عَاشُورَاءَ، فَمَنْ شَاءَ صَامَهُ، وَمَنْ شَاءَ تَرَكَهُ‏.‏
    Tarjumah: Hazrat Aisha Radhiallahu Anha bayan karti hain ki Aashoora ke din zamana e jahiliyyat mein Quraish roza rakha karte the aur RasoolAllah Sallallahu Alaihi Wasallam bhi rakhte they. Phir jab Aap Sallallahu Alaihi Wasallam Madina tashreef laaye to Aap Sallallahu Alaihi Wasallam ne yahan bhi Aashoora ke din roza rakha aur uska logon ko bhi hukm diya. Lekin Ramadhan ki farziyyat ke baad Aap ne Aashoora ke din roza rakhna chor diya aur farmaya ki ab jiska dil chahe is din roza rakhe aur jiska dil chahe na rakhe.
    (Sahih Bukhari: 2002)

    (3) Sirf 9 Moharram ka roza:
    Abdullah bin Abbas Radhiallahu Taala Anhuma bayan karte hain:
    حِينَ صَامَ رَسُولُ اللَّهِ صلى الله عليه وسلم يَوْمَ عَاشُورَاءَ وَأَمَرَ بِصِيَامِهِ قَالُوا يَا رَسُولَ اللَّهِ إِنَّهُ يَوْمٌ تُعَظِّمُهُ الْيَهُودُ وَالنَّصَارَى ‏.‏ فَقَالَ رَسُولُ اللَّهِ صلى الله عليه وسلم ‏ "‏ فَإِذَا كَانَ الْعَامُ الْمُقْبِلُ - إِنْ شَاءَ اللَّهُ - صُمْنَا الْيَوْمَ التَّاسِعَ ‏"‏ ‏.‏ قَالَ فَلَمْ يَأْتِ الْعَامُ الْمُقْبِلُ حَتَّى تُوُفِّيَ رَسُولُ اللَّهِ صلى الله عليه وسلم
    Tarjumah: Jis waqt Nabi Sallallahu Alaihi Wasallam ne Aashoora ke din roza rakha aur uske rozay ka hukm farmaya to Sahaba ne kaha aye Allah ke Rasool Sallallahu Alaihi Wasallam! Is din to Yahood aur Nasara ta’zeem karte hain to Nabi Sallallahu Alaihi Wasallam ne farmaya ki jab agla saal aayega to hum 9 tareekh ka bhi roza rakhenge. Rawi ne kaha ki abhi agla saal nahi aaya tha ki Nabi Sallallahu Alaihi Wasallam wafat paa gaye.
    (Sahih Muslim: 1134)

    (4) 9 aur 10 ya 10 aur 11 Muharram ka roza rakhna:
    Kuch riwayaat mein Aahsoora ko aik din pehle ya aik din baad mein milaane ka zikr milta hai. Riwayat dekhen:
    Hazrat Abdullah bin Abbas Radhiallahu Anhuma se riwayat hai ki Nabi Sallallahu Alaihi Wasallam ne farmaya:

    صوموا يومَ عاشوراءَ، وخالفوا فيه اليهودَ، صوموا قبلَه يومًا، و بعدَه يومًا۔
    Tarjumah: Aashoora ka roza rakho aur us mein Yahudiyon ki mukhalifat karo. Aik din pehle aur aik din baad us ke saath roza rakho.
    * Is riwayat ko Sheikh Albani aur Allama Shawkaani Rahimahumallah waghera ne Zaeef qarar diya hai.
    Dekhen {Zaeef ul Jami’ (Albani): 3506, Nail ul Awtaar (Shawkaani): 4 / 330}


    Aik doosri hadees mein و ki jagah او ka zikr hai:

    صوموا يومَ عاشوراءَ وخالِفوا اليَهودَ ، صوموا قبلَهُ يومًا أو بعدَهُ يومًا
    * Is Hadees ko bhi Shaikh Albani Rahimahullah ne zaeef qarar diya hai. {Sahih Ibn e Khuzaima (Albani): 2095}

    Isi tarah aik aur riwayat is tarah ki milti hai. Nabi Sallallahu Alaihi Wasallam farmate hain:

    لئن بقيتُ لآمُرَنَّ بصيامِ يومٍ قبلَه أو يومٍ بعدَه. يومِ عاشوراءَ
    Tarjumah: Agar main (agle saal) zinda raha to main Aashoora ke saath aik din pehle ya aik din baad mein roza rakhne ka hukm dunga.
    * Isey Shaikh Albani Rahimahullah ne Munkar kaha hai.
    (Silsila Az-Zaeefah: 4297)

    Rozon ke mutalliq upar zikr ki gayi chaaron qismon se yeh baat wazeh hoti hai ke Muharram mein do qism ka roza rakhna badey Ajr o Sawaab ka kaam hai.
    Aik to aam taur par kasrat se roza rakh satke hain kiyunki is mein roza rakhna Ramadhan ke rozon ke baad sab se afzal qarar diya gaya hai. Doosra Aashoora ka roza. Ashoora ke mutalliq yeh ikhtelaaf hai ki konsa roza rakhna afzal hai?

    Is silsile mein sab se umdah qaul yeh hai ke 9 Muharram aur Yaum e Aashoora (yani 10 Muharram) dono ka roza rakhna afzal hai is liye ki Nabi Sallallahu Alaihi Wasallam ne 10 Muharram ka roza rakha aur 9 Muharram ka roza rakhnay ki niyat ki. Hafiz Ibn e Hajar Rahimahullah likhte hain ke Nabi Sallallahu Alaihi Wasallam ne jo 9 Muharram ke rozay ka iradah kiya us ke mae’nay mein ihtemal (probability, verisimilitude) hai ke sirf 9 par hi munhasir nahi balki us ke saath 10 ka bhi izafah kiya jayega, ya to us ki ahtiyaat ke liye ya phir Yahood o Nasara ki mukhalifat ki wajah se aur yahi Raajih hai jo Sahih Muslim ki baaz riwayaat se bhi maloom hota hai.

    (Fatah ul Baari: 4 / 245)

    Lekin akeley 10 Muharram ya akeley 9 Muharram ka roza rakhna bhi masnoon hai jaisa ki daleel se saabit hai. Raha 9 aur 10 ya 10 aur 11 ya 9, 10 aur 11 to ulama ne in sooraton ko bhi jaayez kaha hai kiyunki is masle ki riwayaat mein zo’f halka hai. Meri nazar mein 9 aur 10 Muharram ka roza rakhna behtar aur afzal hai.

    Aashoora Ke Deegar Masail:
    (1) 9 ya 10 Muharram ka akela roza hafta ya Juma ko pad jaaye to us din akela roza rakhnay mein koi harj nahi hai jaisa ki Arafah ka roza.

    (2) Agar kisi ke upar Ramadhan ka roza qaza ho to woh bhi Aashoora ka roza rakh sakta hai kiyunki qaza ke liye fauran roza rakhna zaroori nahi hai.

    (3) Aksar jaghon par eeswi tareekh (english date) chalti hai jis ki wajah se kahin kahin logon ko raat mein Arabic tareekh ka ilm nahi ho pata aise log Fajr ke baad din mein bhi Aashoora ki niyat kar sakte hain kiyunki nafli rozay mein Nabi Sallallahu Alaihi Wasallam se din mein bhi rozay ki niyat karni saabit hai shart yeh hai ke Fajr ke baad kuch khaaya piya na ho.

    (4) Musafir ko agar roza rakhne mein diqqat na ho to Aashoora ka roza rakhna ziyadah behtar hai taaki us ki fazeelat paa sake.

    (5) Qaza rozay aur Aashoora ko aik niyat mein ikhaththa kar sakte hain magar afzal soorat yahi hai ki qaza alag rakhe jaayen aur Aashoora alag.

    (6) Agar Aashoora Monday ya Thursday ko aa jaye to us Monday aur Thursday ki niyat se Aashoora ko bhi mila sakte hain.

    (7) Kaffaraat (expiations) ka roza (jo ki wajibi hai) Aashoora ke saath aik niyat mein nahi rakh sakte kiyunki Kaffaraat (expiations) ki niyat se Aashoora ka ajr nahi milega. Kuch ahl e ilm ne dono ko jama karne ka bhi zikr kiya hai.

    (8) Aashoora ke rozay ki baad mein qaza nahi hai is liye jis se yeh roza choot jaaye woh is ki qaza na kare.

    (9) Jis ki niyat Aashoora ka roza rakhne ki thi magar kisi uzr (excuse) ki wajah se nahi rakh saka to Allah ka fazl wasee hai woh niyat ke hisaab se bhi ajr deta hai. Misaal ke taur par koi ain waqt par (means last time par) bemaar pad gaya ya aurat ko haiz ya nifas ka khoon aa gaya waghera.

    (10) Shaikh ul Islam Ibn e Taymiah Rahimahullah ne likha hai ke Taharat, Namaz, Ramadhan ka roza, Arafah ka Roza aur Aashoora ke rozay se sirf sagheera (choote) gunaah maaf hote hain.

    Aashoora ke rozay ke manfi (negative) cheezein:
    Ahadees ki roshni mein zahir hai ke is maheenay mein sirf rozay ka zikr milta hai magar is ke bar-khilaaf (opposite) Bid’atiyon ne khaane peene ke mukhtalif Bid’ati darwaze khol rakhe hain, khud bhi ajr se mehroom ho kar Bid’at ki gumraahi mein doobe huwe hain aur saade logon ko bhi fitne mein mubtala kar rakha hai.

    Bid’atiyon ka kehna hai ke Karbala ke shaheedon par paani band hone ki yaad mein Sabeel lagana aur un ki roohon ke liye Fatiha ke zariye esaal e sawab karna (sawaab pahunchana) chahiye. Yeh Bid’at hai aur har Baid’at gumraahi hai aur har gumraahi ka thikana jahannum hai. Is liye musalmanon ko Aashoora mein achche achache pakwaan banane aur khane se bachna chahiye aur us din ka roza rakhna chahiye.

    Aashoora Se Mutalliq Zaeef aur Mauzoo Riwayaat:
    (1) إنَّ اللهَ خلق السماواتِ والأرضَ يومَ عاشوراءَ
    Tarjumah: Be-shak Allah ne Aashoora ke din zameen o aasmaan ko paida kiya.

    * Yeh riwayat Mauzoo (manghadat) hai.

    (2) مَنِ اكتحلَ بالإثمدِ يومَ عاشوراءَ لم يرمَدْ أبدًا
    Tarjumah: Jis ne Aashoora ke din surma lagaya to usay kabhi takleef nahi hogi.

    * Yeh riwayat Mauzoo hai. Allama Albani Rahimahullah ne isko Mauzoo kaha hai.
    {Silsila Az-Zaeefah (Albani): 624}


    (3) من صام يومَ عاشوراءَ كتب اللهُ له عبادةَ ستِّين سنةً بصيامِها وقيامِها
    Tarjumah: Jis ne Aashoora ke din roza rakha Allah us ke liye saath (60) saal rozay aur qiyam ka ajr likhega.

    * Yeh riwayat bhi Mauzoo hai.
    {Mauzoo’aat (Ibn e Jawzi): 2 / 570)


    (4) مَن وَسَّعَ على عِيَالِهِ في يومِ عاشوراءَ، وَسَّعَ اللهُ عليه في سَنَتِهِ كلِّها
    Tarjumah: Jo shakhs Aashoora ke din apne ahl o Ayaal par farakhi (kushadgi) se kharch karega, Allah Taala saal bhar us ko farakhi ataa farmayega.

    * Yeh riwayat Zaeef hai. Allama Albani Rahimahullah ne isko Zaeef kaha hai.
    {Zaeef ul Jami’ (Albani): 5873}


    (5) إن آدم تاب الله عليه يوم عاشوراء ، ونوحاً نجاه الله يوم عاشوراء وإبراهيم نجاه الله من النار يوم عاشوراء ويونس أخرجه الله من بطن الحوت يوم عاشوراء ويعقوب اجتمع بيوسف يوم عاشوراء والتوراة نزلت يوم عاشوراء
    Tarjumah: Aashoora ke din ko Adam Alaihissalam ne tauba ki, aur Nooh Alaihissalam ko Allah ne Aashoora ke din najaat di, aur Ibrahim Alaihissalam ko Allah ne Aashoora ko aag se najaat di, aur Younus Alaihissalam ko Allah ne machli ke pait se Aashoora ke din nikala, aur Yaqoob o Yousuf Aashoora ko miley aur Taurat Aashoora ke din nazil hue.

    * Is qism ki saari riwayaat zaeef aur mauzoo hain.

    (6)أن أعرابيًّا سأل النبي صلى الله عليه وسلم عن صوم يوم عرفة ويوم عاشوراء، فقال: يوم عاشوراء يكفر العام الذي قبله والذي بعده، ويوم عرفة يكفر العام الذي قبله۔ (رواہ ابویعلی الموصلی بسند ضعیف : اتحاف الخیرہ 3/84)
    Tarjumah: Aik dehaati ne Nabi Sallallahu Alaihi Wasallam se Arafah aur Aashoora ke rozay ke mutalliq sawaal kiya to Aap ne farmaya: Aashoora se aik saal pehle aur aik saal baad ke gunah aur Arafah se pichle aik saal ke gunah maaf hote hain.

    * Yeh riwayat zaeef hai is ke Sanad aur Matan dono mein kharabi hai.

    (7) من صلَّى يومَ عاشوراءَ ما بين الظُّهرِ والعصرِ أربعين ركعةً يقرأُ في كلِّ ركعةٍ بفاتحةِ الكتابِ مرَّةً ، وآيةِ الكرسيِّ عشرَ مرَّاتٍ ، و{ قُلْ هُوَ اللهُ أَحَدٌ} إحدَى عشرةَ مرَّةً ، والمُعوِّذَتْين خمسَ مرَّاتٍ ، فإذا سلَّم استغفرَ سبعين مرَّةً أعطاه اللهُ في الفردوسِ قُبَّةً بيضاءَ ، فيها بيتٌ من زمردُّةٍ خضراءَ ، سعةُ ذلك البيتِ مثلُ الدُّنيا ثلاثَ مرَّاتٍ ، وفي ذلك البيتِ سريرٌ من نورٍ ، قوائمُ السَّريرِ من العنبرِ الأشهبِ على ذلك السَّريرِ ألفُ فراشٍ من الزَّعفرانِ
    Yeh banawti namaz ka tareeqa hai jiska maf-hoom yeh hai ki jis ne Aashoora ke din Zohr aur Asr ke darmiyan 40 rakat parhi. Har rakat mein aik baar Surah Fatiha, 10 baar Ayat al Kursi, Qul-Huwallahu Ahad «قُلْ هُوَ اللهُ أَحَد» 11 baar, Mu’awwazatain 5 baar parhe. Aur jab salam phere to 70 baar isteghfaar kare.

    * Yeh gadhi hue (Mauzoo) riwayat hai.

    (8) ومن أشبع أهل بيت مساكين يوم عاشوراء مر على الصراط كالبرق الخاطف ومن تصدق بصدقة فكأنما لم يرد سائلا قط ومن اغتسل يوم عاشوراء لم يمرض إلا مرض الموت
    Tarjumah: Jis ne ahl e ba’it ke masakeen ko Aashoora ke din khilaya woh Siraat ke pul (bridge) par bijli ki raftaar se guzrega aur jis ne sadqa kiya woh mohtaaj nahi hoga aur jis ne Aashoora ko ghusl kiya usey mout ki bemaari ke alawah koi bemaari nahi hogi.

    * Yeh riwayat Mauzoo (gadhi hue) hai.

    (9) ما من عبد يبكي يوم قتل الحسين يعني يوم عاشوراء إلا كان يوم القيامة مع أولي العزم من الرسل
    Tarjumah: Jo koi Hussain Radhiallahu Anhu ki shahadat ke din yani Aashoora ke din royega woh qayamat ke din ulul azm peghambaron (Messengers of strong will) ke saath hoga.

    * Yeh riwayat Mauzoo (gadhi hue) hai.

    (10) من صام يوم عاشوراء أعطى ثواب عشرة آلاف ملك
    Tarjumah: Aashoora ke din roza rakhne waale ko 10 hazaar firshton ka sawab diya jayega.

    * Yeh riwayat Mauzoo (gadhi hue) hai.

    In ke alawah bhi bahut si Zaeef aur Mauzoo riwayaat bayan ki jaati hain jin ke zikr ka yeh maqam nahi.
     
    Last edited: Nov 1, 2016
  2. مقبول احمد سلفی

    مقبول احمد سلفی Member

    Joined:
    Nov 7, 2016
    Messages:
    73
    Likes Received:
    202
    Trophy Points:
    26
    Gender:
    Male
    Location:
    taif
    jazakallaho khaira
     
    Muhammad Rizwan Salafi, Shad Alam Aur Umar Asari Ne Ise Pasand Kiya Hai.
  3. Umar Asari

    Umar Asari Active Member Staff Member

    Joined:
    Oct 30, 2016
    Messages:
    1,030
    Likes Received:
    2,719
    Trophy Points:
    96
    Gender:
    Male
    Occupation:
    Student
    Location:
    New Delhi, India
    Wa Antum Fajazakumullahu Khairan Mohtaram Shaikh
     
    Muhammad Rizwan Salafi Ne Ise Pasand Kiya Hai.
  4. Syed Zubair

    Syed Zubair New Member

    Joined:
    May 1, 2017
    Messages:
    107
    Likes Received:
    95
    Trophy Points:
    11
    Gender:
    Male
    Occupation:
    Accountant
    Location:
    Hyderabad
    Jazak Allahu Khairan bhai
     
  5. Syed Zubair

    Syed Zubair New Member

    Joined:
    May 1, 2017
    Messages:
    107
    Likes Received:
    95
    Trophy Points:
    11
    Gender:
    Male
    Occupation:
    Accountant
    Location:
    Hyderabad
    Bhai is talooq k barey mey b wazahat kariye hum sab ki k 10 Moharram k din log gharon mey sharbat aur alag alag pakwan karte hai aur logon ko b khane dete hai aur sharbat peelatey hai yeh kehkar k Imaam Hussain Radi Allahu Anhu is din bhooke pyase the toh logon ko khana khilana aur sharbat peelana sawab ka kaam hai... kya aisa karna sahih hai aur in cheezon ki haqeeqat bayan kijiye..?
     
    Muhammad Rizwan Salafi Ne Ise Pasand Kiya Hai.
  6. Umar Asari

    Umar Asari Active Member Staff Member

    Joined:
    Oct 30, 2016
    Messages:
    1,030
    Likes Received:
    2,719
    Trophy Points:
    96
    Gender:
    Male
    Occupation:
    Student
    Location:
    New Delhi, India
    Post mein wazahat ki hai. Mazeed aap khud soochen ki yeh sab baatein kaise sahih ho sakti hain jab ki Allah ke Rasool ﷺ ne is din Roza rakhne ki targheeb di hai?
     
  7. Syed Zubair

    Syed Zubair New Member

    Joined:
    May 1, 2017
    Messages:
    107
    Likes Received:
    95
    Trophy Points:
    11
    Gender:
    Male
    Occupation:
    Accountant
    Location:
    Hyderabad
    Jazak Allahu khairan bhai... is post mey kafi baatein sikhne mili... Allah ap ki is mehnat ko qubool kare. Aameen
     
    Umar Asari Ne Ise Pasand Kiya Hai.
  8. Umar Asari

    Umar Asari Active Member Staff Member

    Joined:
    Oct 30, 2016
    Messages:
    1,030
    Likes Received:
    2,719
    Trophy Points:
    96
    Gender:
    Male
    Occupation:
    Student
    Location:
    New Delhi, India
    Aameen
     
    Shaista khan Salafi Ne Ise Pasand Kiya Hai.

Share This Page