Muqallideen ka waswasaa "Ahle Hadees angrez kee paidaawaar " aur uskaa ilaaj


Muqallideen ka waswasaa "Ahle Hadees angrez kee paidaawaar " aur uskaa ilaaj

Sheikh Maqbool Ahmad Salafi Hafizahullah

islamic dawah center taif KSA
Romanised By: Abdus Sattar

Kai saalon say muqallideen kee taraf say Ahle Hadees kay wajood ko Hindustaan men angrez kee aamad say jod-nay kee naapaak koshish kee jaa rahi hai taaki apnay naye wajood ko logon kee nazron say bachaa sake. Yeh kaam wahi kartaa hai jisay apnay wajood pe bharosaa nahin hotaa.
Darhaqeeqat Ahle Hadees Hindustaan men hi nahin pooree duniya men us waqt say hain jab say Islaam hai, yeh alag baat hai hum haq paraston kee taadaad hameshaa kam rahi hai, iski wajah Allaah rabbul izzat ne khud batlaa di hai. Wa qaleemam min 'ibaadi ash-Shukoor (al-Qur'aan) shukr guzaar banday thoday hi hotay hain.
Ahle Hadees ko angrez kee aamad say jod-nay kay waaste muqallidon kee aqal ka janaazaa nikal gaya. Ek taraf to Ahle Hadees ko angrez kee paidaawaar kahte hain doosri taraf Ahlul Hadees muhaddiseen kee jamaat kah kar shuroo Islaam say iskaa wajood bhee maante hain. Inki aqal pe maatam kiyaa jaaye aur kya kiyaa jaaye ?
Ahle Hadees ka saheeh maanaa aur iski saheeh taareekh samajh len.
Jaisay Ahlus Sunnah say sunnat waale yaani tamaam musalmaan khwaah padhaa ho yaa jaahil muraad hain isee tarah Ahlul Hadees say Hadees pe amal karne waale tamaam musalmaan khwaah padhaa likhaa ho, gair padhaa likhaa muraad hain. Chunaanchay Imaam Ahmad bin Hambal rahimahullaah ne farmaaya :
"Saahibal Hadees indanaa min yasta'malul Hadees" humaaray nazdeeq Ahle-Hadees wah hai jo Hadees par amal kartaa hai.
(Manaaqib al-Imaam Ahmad bin Hambal li-ibnul Jauzee S 209 wa sanaduhu saheeh)
Mein Dewbandi yaa barelwee ko angrez kee aulaad yaa uski paidaawaar nahin kah saktaa Allaah ta'aalaa kay saamnay meri poochh hogi magar in donon ka wajood angrezi daur say hai yeh bil-yaqeen kah saktaa hoon. Mujhe taajjub is baat pe hai Ahle Hadees ko kaise angrez kee paidaawaar kaha jaataa hai ?, zarraa baraabar Allaah ka khauf nahin hotaa. Hind pe raaj karne waalaa angrez to saraapaa kaafir thaa, musalmaan in kaafir kee paidaawaar kaise ho saktay hain ? sharm nahin aatee yeh baat kahte huye.
؎ yeh musalmaan hain jinhen dekh kay sharmaae Yahood
Ahle Hadees kay mukhtalif naam hain, inmen Salafee, Muhammadi, Ahlus Sunnah aur Asaraee waghairah hain. Yeh sab Ahle Hadees kay sifaati naam hain jiskee pahchaan Hadees men taaifay mansoorah batlaai gayi hai. Taaifay mansoorah bhee ek wasafee naam hai yaani nijaat paanay waali jamaat. Is naam ka bhee yeh matlab nahin ki Islaam say hat kar yeh ek alag firqaa hai.
Goyaa Ahlul Hadees men ba-shamool Awwaam wa khawaas sahaabaa, Taaba'een, taba' Taaba'een, Aimmah aur qiyaamat tak aanay waale haamilay kitaab wa sunnat shaamil hain. Iskaa do tok matlab yeh huwaa ki Ahle Hadees sadaa say hain. Aimmah wa muhaddiseen ne angrez kee aamad say sekadon saal pAhle taaifay mansoorah ko Ahle Hadees batlaaya hai. Imaam Ahmad bin Hambal, Imaam Bukhari, Imaam Ali bin al-Madeeni aur bahut say Ahle ilm ne taaifay mansoorah Ahle Hadees hi ko qaraar diya hai.
Hawaalay kay taur pe Daykhen : (ma'rifah 'uloomul Hadees lil-Haakim : 2 wa sahhahu Ibn Hajar al-'Asqalaanee fee Fathul Baari j. 13, S 293 tahat H 7311, MasAlatul Ihtijaaj, bish-Shaafa'ee lil- Khateeb S 47, Sunan Tirmizi ma'rizatul Ahwazee j. 9, S 74 H 2229)
Tawaalat kay khauf say is baat kay zikr ka mauqaa nahin wagarnaa hazaaron Ahle ilm kay aqwaal pesh kiye jaa sakte hain jinhonay angrez say sekadon saal pAhle jamaat Ahle Hadees ka tazkiraa iski madah saraai kee hai.
Ek aam taalibay ilm yaa aam aadami baghair kitaab uththaaye aur baghair taareekh ka pataa kiye yeh baat kah saktaa hai ki ٭ Dewbandi kee ibtida madarsaa Deoband kay qiyaam say hai.
٭ barelwee kee ibtida Ahmad razaa barelwee kee paidaaish kay baad say hai.
٭ aur Ahle Hadees kee ibtida us waqt say hai jab say Hadees aur aamileen bil-kitaab wal Hadees paaye jaatey hain.
Aray miyaan ! tum Ahle Hadees kee baat karte ho. Angrez say humaari koi nisbat hi nahin, hum to asl musalmaan samajh kar aazaadi Hind men gaajar maulaa kee tarah kaatay gaye aur tum to wafaadaaraanay angrez thay, go ki usnay tumhen janam nahin diya magar tumhaara wajood usi wafaadaar ne baaqee rakhaa kyunki uskaa saath jo nibhaatay thay.
Madarsaa Deoband ka qiyaam 1867 aur Ahmad razaa barelwee kee paidaaish 1865– in donon kay ma'rizay wajood men aanay say pAhle yaani unneesween aur beeswen sadee Eiswee say pAhle firqaa Dewbandiyyah aur firqaa barelwiyyah ka koi wajood hi nahin thaa. Hindustaan men go ki pAhle hi angrez kee aamad ho gayi thi magar 1857 kay baad yahaan iskaa raaj qaayam ho gaya. Jisnay is raaj ka saath diya angrez ka wafaadaar kahlaayaa aur jisnay mukhaalifat kee usay ghaddaar samjhaa gaya aur usay qism qism kee sazaa di gayi. Hamen to mukhaalif samajh kar Wahaabee kaha gaya aur humnay seenon men angrez kee goliyaan khaaeen aur al-Hamdu lillaah Islaam bachaayaa magar mulk ka ghaddaar honay kay saath, deen say bhee kuchh musalmaanon ne ghaddaaree kee jinhen islami taareekh kabhi maaf nahin kar sakti.
Mein pooray Dewbandi musalmaan ko mataoon nahin kartaa aur naa hi kar saktaa hoon. Khaas taur say jo abhi kay Dewbandi inkaa koi qasoor nahin magar taareekhi haqaaiq ka inkaar bhee nahin kiyaa jaa saktaa jismein Deoband aur aalay Deoband ka angrezi Sarkaar say dostaanaa taalluqaat miltay hain.
(1) madarsaa Deoband aur angrezi Sarkaar : jo kaam bade bade collegeon men hazaaron rupyaa kay sarf say hotaa hai wah yahaan kaudiyon men ho rahaa hai. Jo kaam Principal hazaaron rupyaa maahaanah tankhwaah laykar kartaa hai wah yahaan ek maulwi chaalees rupyaa maahaanah par kar rahaa hai. Yeh madarsaa khilaafe Sarkaar nahin balki muwaafiqay Sarkaar mumidd mu'aawinay Sarkaar hai. (maulaanaa Muhammad ahsan Naanotwee, S 217)
(2) madarsaa Deoband kay kaarkunaan aur angrez : madarsaa Deoband kay kaarkunon men aksaryat aisay buzurgon kee thi jo Government kay qadeem mulaazim aur haal pensions thay jinkay baaray men Government ko shak wa shubah karne kee koi gunjaaish hi naa thi. (haashiyah sawwaney Qasimee, j. 2, S 247)
(3) madarsaa Deoband kay baani aur angrez : maulwi Muhammad Qaasim Naanotwee saahib ka angrezi madarsaa Dehli say bhee taalluq rahaa (tazkiraa ulmaaye Hind Faarsi S 210 naulakshoorpar yaaseen Lakhnau 1914)
Is angrezi College ka maqsad bhee jaan len.
" arabi College (Dehli) kee mashin men jo kal purzay dhaalay jaatey thay inke mutaalliq taye kiyaa gaya thaa ki soorat wa shakl kay aur bairoonee lawaazim kay hisaab say to wah maulwi hon aur mazaaq wa raae aur samajh kay aetbaar say aazaadi kay saath haq kee talaash karne waali jamaat ho ". (sawwaney Qasimee, j. 1, S 97-96)
Isee College kay tarbiyat yaaftaa maulwi Qaasim, unkay Ustaad mamlook Ali aur maulwi ahsan Naanotwee waghairah thay. Daykhen. (maulaanaa ahsan Naanotwee, S 77, 25) arwaahay salaasaa, S 301) aur (tazkiraa ulamaa Hind, S 210)
(4) maulwi Rasheed Ahmad Gangohi aur angrez : Dewbandi halqay kay mumtaaz Musannif maulwi Aashiq ilaahi Meerathee apnee kitaab Tazkiratur Rasheed men angrezi hukoomat kay saath maulwi Rasheed Ahmad saahib Gangohi kay niyaaz mandaanaa jazbaat kee tasweer kheenchte huye ek jagah likhte hain aap samajhe huye thay ki mein jab haqeeqat men Sarkaar ka farmaan bardaar hoon to jhoohay ilzaam say meraa baal beekaa naa hogaa aur agar maaraa bhee aa gayaa to Sarkaar Maalik hai isay ikhtiyaar hai jo chaahay karay.) Tazkiratur Rasheed j.1, s80 idaara Islaamiyaat Laahaur)
(5) maulwi ashraf Ali thaanwi saahib ko Sarkaar Bartaaniyaa (angrez) say chhe sau rupaye maahwaar milaa karte thay (Makaalamatus Sadarain safah Number 9, daar al ishaat Deoband Zila Sahraanpoor)
(6) tableeghee jamaat kay baani maulwi Ilyaas Kaandhalwee ko Sarkaar Bartaaniyaa (angrez) say ba-zariyaa letter paise miltay thay – (Makaalamatus Sadarain safah Number 8)
(7) jamiyyat ulmaaye Islaam ko hukoomat Bartaaniyaa (angrez) ne qaayam kiyaa aur inki imdaad kee-(Makaalamatus Sadarain safah Number 7)
Hujjat qaayam karne kay liye ek hi saboot kaafi hotaa hai magar yahaan is qadr saboot maujood hain ki aankhen band karne say bhee haqaaiq ojhal nahin hotay.
Khulaasaa bayaan karte huye yeh kah saktaa hoon ki Dewbandi firqaa angrez kay daur say maariz wajood men aayaa, is firqe kay sar kardaa ulamaa wa mashaaikh kee tarbiyat angrezi School men hui, is firqe pe angrezon kay be panaah ahsaanaat hain yaa yeh kah len ki angrezi saath nibhaanay say inhen khoob khoob angrezi inaamaat milay.
؎ aap hi apnee adaaon pe zaraa ghaur karen
Hum agar arz karenge to shikaayat hogi
Bahut maazrat kay saath un naadaanon kay naam jo logon men waswasaa paida karte hain ki Ahle Hadees angrez kee aulaad hain.
 
Top