Raham E Maadar Ki Paiwand Kaari Islaam Ki Nazar Me


Raham E Maadar Ki Paiwand Kaari Islaam Ki Nazar Me

Tehqeeq: Shaikh Maqbool Ahmad Salafi Hafizahullaah
Islamic Dawa Center Taif
Romanised: Khadija Muhammad

Technology Ke Is Hairaan Kun Daur Me Insaano Ko Hairaan Kar Dene Wali New New Daryafate Ho Rahi Hai,Daryafate Kaisi Bhi Ho Maadah Parasti Ke Daur Me Aksar Log Bila Samjhe Bujhe Unki Haami Bharne Lagte Hai,Ek Musalmaan Hone Ki Haisiyat Se Hamara Fariza Banta Hai Ke Jo New New Daryafate Ho Rahi Hai Unke Mutalliq Ulmaae Islaam Se Sharai Haisiyat Daryaafat Kare Ke Kahi Anjaane Me Haraam Kaam Me Mulavvis Na Ho Jaae. Islaam Na Science Ke Mukhaalif Hai,Na New Iyjaadaat Aur Iktishaafaat Ka Mukhaalif Hai Aur Na Hi Jadeed Aalaat Aur Technology Ke Mukhaalif Hai. Haa Islaam Ek Munazzam Nizaam Hayaat Paish Karta Hai,Uske Apne Usool Aur Ta'leemaat Hai,New Daryafate Aur Technology Ki Jo Chiz Islaam Nizaam Se Mutasaadim Hogi Uska Istemaal Hamaare Liye Jaiz Nahi Hoga.
Maadar E Raham Ki Paiwand Kaari Bhi Duniya Walo Ke Liye Ek New Khoj Hai,Go Ke Is Par Barso Se Tajrubah Kiya Ja Raha Tha. Pehle Janwaro Par Tajrubah Kiya Gaya Waha Kamyabi Mili To Fir Insaano Par Barta Gaya Aur Mutaddid Qurbaniyo Aur Insaani Halakato Ke Baad 3 Mumalik (Sweden,America,Aur India)Me Ab Tak Madare Raham Ki Paiwand Kari Par Tajrubah Kamyab Hua Hai. Pehli Baar 2014 Me Sweden Me Kamyabi Mili Aur Fir 2017 Me America Aur India Me Yah Tajrubah Kamyabi Ke Marhale Se Guzra.
Maadar E Raham Ko English Me Uterus Aur Paiwand Kari Ko Transplant Kaha Jata Hai Is Tarah Maadar E Raham Ki Paiwand Kari Ki English Istilaah Uterus Transplant Raaij Hai. India Ke City Pune Ke Galaxy Nami Hospital Me Gujrat Ki Rehne Wali Khaatoon Minakshi Waland Ne 18 October 2018 Ko Ek Beti Ko Janam Diya Jis Me Usi Ki Maa Ki Bachcha Daani Transplant Ki Gai Thi. Is Baat Se Jaha India Ka Sar Fakhar Se Buland Ho Raha Hai Wahi Logo Me Is Ka Tajrubah Ki Khushi Manaai Ja Rahi Hai Aur Mustaqbil Me Aurat Ke Banjh Pan Ke Khatme Ki Ummid Jatlaai Ja Rahi Hai.
Abhi Tak Duniya Me Jise Bachcha Na Ho Woh Ya To Sabar Karta Raha Hai,Ya Kisi Aurat Ki Kokh Kiraya Par Le Kar Surrogate Bachcha God Liya Hai Ya Dusre Ka Bachcha Adoption God Liya Hai. Dusri Surat Ko Sarogasy Ya Surrogate Mother Hood Kaha Jata Hai,Is Ka Tariqah Kaar Yah Hai Ke Mard Ki Mani Aur Aurat Ka Baiza Mila Kar Laboratory Me Janeen Taiyar Kiya Jata Hai Fir Taiyar Shudah Janeen Ko Injection Ke Zariya Aurat Ki Bachcha Daani Me Dala Jata Hai. Islaam Me Yah Amal Na Jaiz Hai. Masnui Hamal Ke Kai Aqsaam Hai,Un Me Kuch Jaiz Bhi Hai Is Par Aage Bahas Aae Gi.

MAADAR E RAHAM KI PAIWAND KAARI KE ASBAAB AUR MAQAASID:
☆Shadi Ke Baad Ek Aurat Ki Khwahish Maa Banne Ki Hoti Hai Lekin Jab Use Shadi Ke Baad Bachcha Paida Nahi Hota Hai To Dar Dar Ki Thokar Khati Hai,Dr Se Madad Ki Guhaar Lagaati Hai Yah Badi Wajah Bani Maadar E Raham Ki Paiwand Kari Ki.
☆ Iske Alawah Mujhe Yah Wajah Bhi Kuch Kam Badi Nahi Malum Hoti Hai Ke Aaj Kal Badi Tadad Me Aurat Apni Bachcha Daani Katwa Kar Phaink Rahi Hai,Hospital Me Badi Tadad Me Zaae Hone Wale Insaani Azw(Raham E Maadar)Ki Maujudgi Ne Doctor 's Aur Science Dano Ko Is Taraf Tavjjoh Mabzool Kiya Aur Usko Kaar Aamad Banane Me Gaur Aur Fikar Ki Dawat Di.
☆ Scientists Duniya Walo Ko New New Khoj Se Mutarif Karane Ki Hima Waqt Koshish Karte Rehte Hai,Is Pehlu Par Kisi Ki Nazar Gai Aur Tajrubah Shuru Ho Gaya,Halakato Ke Bawajud Is Par Musalsal Tajrubah Ki Wajah Yah Bani Ke Yah Maeeshat Ka Bada Darwaza Khol Raha Tha,Jise Aulaad Na Ho Rahi Ho Uske Liye Aulaad Ki Ummid Jagane Wala Munh Mangi Raqam Haasil Kar Sakta Hai.
☆ Kuch Aurato Ke Sath Raham Ki Paichidgi Hoti Hai Jis Ki Wajah Se Use Majburan Hatana Padhta Hai,Kuch Aurto Me Paidaishi Taur Par Bachcha Daani Hi Nahi Hoti,Kuch Ke Paas Bahut Choti Hoti Hai To Kuch Ka Hamal Baar Baar Isqaat Ho Jata Hai,Kuch Ko Sire Se Hamal Hi Nahi Theharta. Yah Baate Bhi Maadar E Raham Ke Transplant Ke Liye Muharrik Bana.
Science Aur Doctor Ka Manna Hai Ke Maadar E Raham Ki Paiwand Kari Ka Maqsad Yah Hai Ke Jo Aurat Banjh(Infertility) Ho Ya Kisi Wajah Se Bachcha Nahi Ho Raha Ho Aur Woh Kisi Dusre Ki Kokh Ma Bachcha Bhi Nahi Chahti Ho,Apni Hi Kokh Se Bachcha Janam Dena Chahti Ho Aysi Har Aurat Maa Ban Sakti Hai Aur Apni Hi Kokh Se Bachcha Janam De Kar Apni Aarzoo Puri Kar Sakti Hai,Isi Maqsad Ke Tahat Maadar E Raham Ki Paiwand Kaari Ka Amal Muarriz Wajood Me Aaya Hai.

MAADAR E RAHAN KI PAIWAND JAARI KA TARIQAH:
Ek Aurat Ki Bachcha Daani Nikaal Kar Dusri Aurat Me Paiwand Ki Jati Hai,Umooman Qareebi Aurat Maa,Bahan Ya Khala Ki Bachcha Daani Behtar Maani Jati Hai Kyu Ke Unke Darmiyan Tissues Aur Khulie Me Mumasilat Paak Jati Hai. Maadar E Raham Ki Paiwand Kaari Ka Mukammal Amal 10 Se 13 Ghanto Par Mushtamil Nihayat Dushwaar Guzaar Hota Hai Kuy Ke Insaani Badan Me Ek Anjaan Azw Lagne Se Use Mustard Kiye Jane Ka Sangeen Khatrah Laga Rehta Hai. Isme Bachcha Daani Ki Hi Paiwand Kaari Hoti Hai. Naso Air Baiza Daani(Ovary)Ki Nahi. Azw Bandi Ke Baad Ek Saal Tak Uski Khub Nigraani Ki Zaroorat Hai. Fir Laboratory Test Se Hamal Ki Salahiyat Zaahir Hone Par Shohar Ke Nutfe Aur Biwi Ke Baize Ko Laboratory Me Janeen Banaya Jata Hai Iske Baad Injection Ke Zariya Aurat Ki Kokh Me Nasab Kiya Jata Hai. Sweden Ke Kamyab Tajrubah Me 11 Nutfe Taiyar Kiye Gae The Aur Unhe Munjameed Nutfa Bachcha Daani Me Dala Gaya.

MAADAR E RAHAM KI PAIWAND KAARI KI HALAKATE:
Maadar E Raham Ki Paiwand Kaari Intihaai Khatarnaak Hai,Is Se Na Sirf Bimaari Laahiq Hoti Hai Balke Jaan Bhi Chali Jati Hai Aur Is Amal Ke Irtiqaai Adwaar Me Kai Jaan Jane Par Taarikh Shahid Hai. Umoomi Khatrah Yah Hai Ke New Azw Ka Izaafa Jisam Qabool Nahi Kar Pata Hai Aur Jald Hi Ise Kaat Kar Hata Diya Jata Hai Aur Yah Mutaddid Bimariyo Ka Sabab Ban Sakta Hai. Is Aalam Me Saal Bhar Khatraat Mandhlaate Hai Aur Kadi Nigraani Ki Jati Hai Aur Quwwate Mudafiat Dawao Ke Zariya Susat Kar Di Jati Hai Taaki Azw Jadeed Ko Qabool Kar Sake Magar Mudafiati Quwwat Ki Kami Se Diabetes Ka Khatrah Badh Jata Hai,Uske Sath BP Ke Badhne Aur Kam Hone Ka Bhi Khatrah Rehta Hai Balke Yah Aurat Ke Liye Jaan Lewa Bhi Hai. Murdah Aurat Ki Bachcha Daani Ki Muntaqili Kaamiyab Nahi Hai Is Wajah Se Zindo Se Hi Yah Azw Liya Jata Hai Balke Gair Aurat Ki Bachcha Daani Ka Transplant Tajrubahti Aitbaar Se Nuksaan Deh Batlaya Ja Raha Hai Is Liye Qareebi Aurat Maa Ya Bahan Ya Khala Wagairah Ki Bachcha Daani Kam Nuqsaan Wala Batlaya Ja Raha Hai Kuy Ke Unke Darmiyan Tissue Aur Khalie Me Ziyada Mumasilat Paai Jaati Hai. Surgery Ke Alawah Hamal,Tawalud Aur Zachcha Bachcha Tamam Maraahil Mushkil Tareen Hai. Na Hi Hamal Aasan Hota Hota Hai Aur Na Hi Zachgi,Aur Kam Waqto Me Bachche Ki Paidaaish Ho Jati Hai Jis Se Maulood Ko Sakhat Hifazat Ki Zaroorat Hoti Hai. Hamal Aur Zachgi Ke Dauraan Pechidgiya Paida Hone Se Zachcha Aur Bachcha Dono Ko Jaan Ka Khatrah Laahiq Ho Sakta Hai.
1931 Me Germany Me Ek Hijde(Transgender)Me Bachcha Daani Ko Transplant Kiya Gaya Lekin Yah Amal Kamyab Na Hua Aur Uski Jaan Chali Gai. 2002 Me Saudi Arab Me Ek 26 Year Ki Aurat Me 46 Year Ajnabi Aurat Ki Bachcha Daani Ki Muntaqili Ka Amal Hua Magar Infection Ke Sabab Chand Hafto Me Hi Yah Azw Nikal Na Padha 2014 Me Sweden Me Taarikh Ka Pehla Bachcha Maadar E Raham Ki Paiwand Kaari Se 31 Hafte Me Paida Hua Aur Paidaaish Ke Waqt Dil Ki Dhadkan Khilaaf E Maamul Paya Gaya. Hindi Khatoon Minakshi Ke Pait Sirf 22 Hafte Hi Bachcha Paida Hua Aur Woh Is Maulud Tak Rasaai Haasil Karne Ke Liye Musalsal 17 Month Tak Hospital Me Intihaai Nigraani Me Zair E Ilaaj Rahi. Minakshi Ka Maadar E Raham Ki Paiwand Kaari Kar Rahe Dr. Shailaish Ka Kehna Hai Ke Yah Amal Intihaai Khatarnaak Hai Woh Kehte Hai Ke Ab Tak Is Tarah Se Duniya Me 11 Hamal Thehra Hai,9 Sweden Me,2 Unaidet Staus Me Aur 12 Bachcha Hamara Hai. Yah Koi Aasaan Surgery Nahi Hai Aur Na Hamal Tehrna Aasaan Hai.
Bahar Haal! Yah Amal Khatraat Par Mushtamil Hai Duniya Bhar Me Kitni Sari Aurto Ka Maadar E Raham Ki Paiwand Kaari Kiya Gaya,Aksar Ko Nuqsaan Hua,Ab Tak Sirf 12 Bachcho Ki Paidaaish Ka Zikar Milta Hai,Yah 12 Bachche Bhi Sirf Dawe Hai Un Sab Ki Tafseel Nahi Milti Us Ka Sab Se Khatarnaak Pehlu Yah Hai Ke Surgery,Hamal Aur Paidaaish Sab Ummid Par Qaaim Hai Yani Natijah Ka Yaqeen Nahi Hota Sirf Ummid Par Yah Sara Amal Anjaam Diya Jata Hai Aage Kuch Bhi Ho Sakta Hai.

BIRTH CONTROL AUR MAADAR E RAHAM KI PAIWAND KAARI KA TASAADUM:
Maahireen E Tibb Ne Khushhaali,Taaleem Taraaqi Aur Sagar Ka Nara Laga Kar Khushnuma Tariqe Se Birth Control Karne Aur Khandan Chota Banane Ka Mansuba Diya Jise Khandani Mansuba Bandi Ka Naam Diya Jata Hai,Ulmaae Tube Ki Is Tajviz Aur Mansuba Bandi Se Samaj Par Mohlik Asraat Murattab Hue,Isqaat E Hamal Aur Zabat Wilaadat Ke Mukhtalif Tariqe Apnaae Jaate Hai Yaha Tak Ke Nas Bandi Aur Chota Khandaan Fakhar Ka Bais Ban Gaya. Aaj Awaam Tabahi Ke Dahane Par Pohnch Gai Hai. Maa Ke Pet Me Masum Bachchiyo Ka Qatal Koi Gunaah Nahi Samjha Jata Yaha Tak Ke Wazae Hamal Ke Baad Bhi Zindah Bachchiyo Ko Dustbeen Me Phaink Diya Jata Hai Koi Murdah Laash Ko Bhi Is Tarah Nahi Phainkta Us Waqt 100 Me Se Chand Aurat Hi Birth Control Se Bach Paati Hongi. Hospitals Me Bachcha Janam Dene Wali Bahut Si Aurte Raham E Maadar Katwa Kar Nikaal Deti Hau Hindustaani Hukoomat Ne Is Ki Free Service Gaon Gaon Tak Muhaiya Kar Di Hai Khandaani Mansubah Bandi Ki Ek Taraf Aysi Tabaahi To Dusri Taraf Yahi Maahireen E Raham Maadar Ko Dubara Jodne Ka Kaam Kar Rahi Hai. Khandaani Mansuba Bandi Ke Khushnuma Na're Aur Amali Aqdaam Ne Kitne Masum Bachcho Ki Jaan Li,Kitni Jano Ko Duniya Me Aane Se Roka Aur Kitni Aurto Ko Is Muhlik Raste Se Guzarne Me Apni Jaan Gawani Padhi. Dar Asal Birth Control Ne Be Aulaadi Aur Banjh Pan Me Izaafa Kiya,Hamal Aur Tavleed Rokne Ke Gair Fitri Tariqe Apnaane Se Raham E Maadar Me Kharabiya Paida Hui Aur Aurto Me Banjh Pan Ki Waba Aam Hui. Zabat Aur Viladat Ke Na're Lagane Wale Log Hi Asal Mujrim Hai Jo Pehle Banjh Pan Ki Bimari Phailate Hai Fir Uska Ilaaj Karte Hai. Sahat Ke Maraakiz Me Aysa Ghinawna Khel Bahut Hota Hai Maal Aur Zar Ki Hawas Me Sahat Mando Ko Bimaar Qaraar De Kar Uska Mehnge Se Mehnat Ilaaj Kiya Jata Hai,Jise Operation Ki Nobat Nahi Use Operation Kiya Jata Hai Had To Yah Hai Ke Sirf Paiso Ki Lalach Me Mareez Ki Wafaat Hone Ke Bawajud Uska Ilaaj Kiya Jata Hai.
Miya Biwi Me Tawalud Ki Kamzori Ka Jaiz Hudud Me Reh Kar Ilaaj Karna Koi Galat Nahi Hai Magar Qudrat Ke Fitri Nizaam Ke Sath Khilwaad Karna Haiwaniyat Aur Zindagi Hai Chahe Zabat Nasal Ke Tahat Aysi Haiwaniyat Sooz Harkat Ki Jaae Ya Afzaish E Nasal Ke Naam Par. Islaam Me Majburi Ki Buniyaad Par Aarzi Mansuba Bandi Karna Jaiz Hai Aur Agar Zaroorat Ke Tahat Maadar E Raham Katna Padhe To Uski Bhi Gunjaish Hai Magar Sirf Shoq Me Ya Kam Bachche Ki Chaahat Me Ya Achchi Parwarish Aur Behtar Taalim Ke Naam Par Birth Control Karna Haraam Hai.

AFZAISH E NASAL KE JADEED TARIQE AUR UNKA SHARAI HUKAM:
Jadeed Science Taraqiyat Me Tavleed Ke Jadeed Tariqe Iyjaad Hue Aur Ho Rahe Hai Mustaqbil Me Yah Qadam Kaha Tak Pohnchne Tak Kuch Kehna Mushkil Hai. Abhi Tak Masnui Takham Rezi (Artificial Insemination), Balki Baar Aawri (Test Tube Fertilization) Surrogate Mother Aur Cloning Wagairah Mukhtalif Aqsaam Paae Jate Hai Kai Saalo Se Maadar E Raham Ki Paiwand Kaari Par Tajrubah Jaari Tha,Is Maidaan Me Ikka Dukka Kamyabi Milne Par Ab Yah Bhi Tauleed Ka Ek Tariqah Maana Ja Raha Hai.

MASNUI TAKHAM ZAIRI KA TARIQAH:
Mard Ke Jalaq Wagairah Se Inzaal Kara Ke Kaseer Miqdaar Me Haasil Shudah Tauleed Ba Zariya Injection Aurat Ke Pet Ke Zeere Hissa(Pelvic Cavity) Me Pohncha Diya Jata Hai Jaha Se Qaazfeen Naali Me Pohnch Kar Pehle Se Maujud Baiza E Unsa Baar Aadat Bana Deta Hai Fir Niche Raham Me Utar Kar Takhleeq Ke Maraahil Pure Karta Hai. Is Tariqah Tauleed Me Jaiz Pehlu Yah Hai Ke Sirf Shohar Ka Nutfah Le Kar Biwi Ke Raham Me Daal Sakte Hai.

TEST TUBE BABY YA NALKI BA AAWARI KA TARIQAH:
Yah Tariqah Takham Rezi Se Mukhtalif Hai,Usme Mard Aur Aurat Ka Nutfah Haasil Kar Ke Ek Shishe Me Rakh Kar Ikhtilaat Karaya Jata Hai,Jab Waha Maadah Bawar Ho Jata Hai To Use Mazeed Kuch Dino Ke Maraahil Teh Kara Kar Maadar E Raham Me Dal Diya Jata Hai Jaha Se Irtiqaai Maraahil Teh Kar Ke Tawalud Hota Hai,Yaha Qaazfeen Naali Ki Zaroorat Nahi Reh Jati Hai. Agar Miya Biwi Ka Nutfah Le Kar,Use Baar Aawar Kar Ke Biwi Ke Raham Me Daala Jaae To Yah Surat Jaiz Hai.

MASNUI TAKHAM REZI AUR TEST TUBE KE GAIR SHARAI TARIQE:
Masnui Takham Rezi Aur Nalki Baar Aawari Me Jo Jaiz Tariqe Hai Unhe Bayan Kar Diya Gaya Hai,Unke Alawah Bahut Sare Na Jaiz Tariqe Hai Un Tariqo Se Bachcha Paida Karna Kisi Musalmaan Ke Liye Jaiz Nahi Hai.
(1) Shohar Ki Mani Aur Dusri Aurat Ka Baiza Le Kar Biwi Ke Raham Me Dala Jaae.
(2) Dusre Mard Ki Mani Aur Biwi Ka Baiza Le Kar Biwi Ke Raham Me Dala Jaae.
(3) Shohar Ki Mani Aur Biwi Ka Baiza Le Kar Dusri Aurat Ke Raham Me Dala Jaae.
(4) Ajnabi Mard Ki Mani Ajnabi Aurat Ka Baiza Le Kar Biwi Ke Raham Me Dala Jaae.
(5) Shohar Ki Mani Aur Pehli Biwi Ka Baiza Le Kar Dusri Biwi Ke Raham Me Dala Jaae.

SURROGATE MOTHER HOOD KA TARIQAH:
Miya Biwi Ka Nutfah Haasil Kar Ke Use Masnui Tariqah Se Baa Aawar Kar Ke Kisi Dusri Aurat Ke Raham Me Rakha Jata Hai Goya Ek Aurat Ki Kokh Kiraya Par Hoti Hai Jab Ke Is Kokh Me Nutfa Miya Biwi Ka Hota Hai. Yah Sarasar Haraam Hai.
Baaz Ulma Ne Sarogasy Me Jawaz Ka Ek Pehlu Nikaal Hai Ke Ek Shakhas Ko 2 Biwiya Ho To Ek Biwi Aur Shohar Ka Nutfah Dusri Biwi Ke Raham Me Uski Ijaazat Se Rakha Ja Sakta Hai Maslan Banjh Biwi Ka Baiza Aur Shohar Ka Nutfah Le Kar Aulaad Janne Wali Biwi Ka Baiza Aur Shohar Ka Nutfah Le Kar Banjh Biwi Ke Raham Me Rakha Jaae. Haqeeqat Me Jawaaz Ka Fatwah Galat Hai Aur Kisi Ke Liye Ek Biwi Ka Baiza Dusri Biwi Ke Raham Me Rakhna Jaiz Nahi Hai. Is Masale Par Raabta E Aalam E Islaami Ki Islamic Fiqah Academy Ka Seminar Ho Chuka Hai Jis Ka Khulasa AL ISLAAM Sawaal Aur Jawaab Ke Fatwah No:23104 Me Mazkur Hai.

INSAANI CLONING KA TARIQAH:
Insaani Cloning Ka Ma'ni Kisi Insan Ki Hu Bahu Naqal Utarna Hai. Iska Tariqah Yah Hai Ke Do Alag Alag Jandaar Jismo Se Gair Jinsi Khaliye Hasil Kar Ke Unka Ikhtilaat Kiya Jata Hai,Ek Khaliye Ka Markazah Nikaal Kar Dusre Khaliya Ke Markazah Me Rakh Diya Jata Hai,Fir Bar Aawar Khaliye Ko Kuch Dino Baad Liye Gae Khaliye Wale Jisam Me Ya Kisi Teesre Jisam Me Takhliq KE Baqi Maraahil Teh Karne Ke Liye Rakh Diya Jata Hai. Do Alag Alag Jismo Se Gair Jinsi Khaliye Ka Husool Kabhi Nar Aur Maadah Se Hota Hai To Kabhi 2 Alag Alag Maadah Se To Kabhi Ek Hi Maadah Ke 2 Mukhtalif Khaliye Se.
Insaani Cloning Me Jaiz Shakal Sirf Yah Hai Ke Miya Biwi Ke Khaliye Biwi Ke Hi Jisam Me Rakh Kar Cloning Kiya Jaae,Baqi Mundarja Zail Tariqe Gair Sharai Aur Na Jaiz Hai.
(1)Miya Biwi Ke Alawah Do Alag Jismo Ke Khaliye Se Insaani Cloning Karna.
(2) Do Alag Alag Aurat Ke Khaliye Se Insaani Cloning Karna.
(3) Ek Hi Aurat Ke Do Mukhtalif Khalie Se Cloning Karna.
(4) Miya Biwi Ke Khaliye Ko Tisre Jisam Se Tauleed Karana.

RAHAM E MAADAR KI PAIWAND KARI KA TARIQAH:
Upar Iska Tariqah Batla Diya Gaya Hai Ke Ek Aurat Me Dusri Aurat Ki Bachcha Daani Nasab Ki Jati Hai Fir Us Mard Aur Aurat Ke Nutfa Ka Husool Kar Ke Laboratory Me Baar Aawar Kiya Jata Hai Fir Use Raham Me Dala Jata Hai. Is Tariqa E Tauleed Me Mutaddid Sharai Khamiya Hai.

RAHAM E MAADAR KI PAIWAND KAARI ME SHARAI KHAMIYA:
(1) Us Me Pehli Khami Mard Aurat Ka Be Pardah Hona Hai.,Donar,Shohar Aur Biwi 3 Afraad Na Jane Kitne Dr Ke Paas Baar Baar Apna Satar Zaahir Karte Hai,Taham Majburi Me Aadmi Apna Satar Dusre Ke Samne Khol Sakta Hai.
(2) Islaam Ne Insaan Ko Mohtaram Banaya Hai, Hifzaane Sahat Ke Sunhere Usool Batlaae Taaki Insaani Jisam Ko Halakat Se Bachaaya Jaae. Hifzaane Sahat Ki Ru Se Kisi Ke Liye Apne Jisam Ko Taklif Dena,Koi Azw Kaat Kar Alag Karna Jaiz Nahi Siwae Iztiraari Halat Ke. Raham E Maadar Kaat Kar Jisam Se Alag Karna Ma Siwa Zaroorat Ke Jaha Fitrat Se Bagawat Aur Musla Ke Hukam Me Hai Wahi Hifzaane Sahat Ke Khilaaf Bhi Hai Kuy Ke Uske Bade Mafaasid Hai.
RAHAM E MAADAR Kaat Kar Jisam Se Alag Karne Ke Nuqsaanat Me Wazan Me Kami Ya Ziyadati Hona,Sharamgaah Me Sukad Pan Paida Hona,Paishaab Me Infection,Aanto Ka Sunana,Khoon ka Jamna, Haddiyo Ka Bhur Bhura Hona,Baiza Daaniyo Me Rasoli Paida Hona Wagairah Hai. Agar Raham E Maadar Ke Sath Ovary Bhi Hata Di Jaae To Aksar Khawaateen Zehni Tanaao Jazbaati Adam Tawazun,Tanhaai Pan Aur Ahsaas E Kamtari Ka Shikaar Ho Jaati Hai,Sath Hi Estrogen Leval Kam Ho Jane Se Dil Ki Bimariya Paida Hone Ka Khatrah Badh Jata Hai. Ek Taraf Raham E Maadar Katwane Wali Ke Liye Bahut Sari Jismani Nuqsaanat Hai To Dusri Taraf Paiwand Kari Ke Bhi Bhayanak Nataij Murattab Hote Hai Jaisa Ke Is Se Pehle Paiwand Kaari Ki Halakat Kheziya Waazeh Ki Gai Hai. Islaam Is Qisam Ke Nuqsaan Deh Kaamo Ki Ijazat Nahi Deta.
(3) Mard Se Gair Fitri Tariqe Se Inzaal Karaya Jata Hai Aur Ba Zariya Operation Aurat Ki Baiza Daani Se Baiza Hasil Kiya Jata Hai. Allaah Ne Hame Tauleed Ka Fitri Tariqah Diya Hai Is Tariqah Ko Barue Kaar Laate Hue Ham Fitri Tariqah Par Aurat Ki Sharamgaah Me Inzaal Karte Hai Jab Ke Maadar E Raham Ki Paiwand Kaari Ke Liye Umooman Jalaq Ke Zariya Kaseer Miqdaar Me Mard Ki Mani Hasil Ki Jati Hai Jis Se Kai Nutfe Bana Kar Munjameed Kar Diye Jate Hai. Iztiraari Halat Me Yah Surat Bhi Jaiz Hogi.
(4) Raham E Maadar Ki Paiwand Kaari Me Atiyah Dene Wali Ek Aurat Ki Zaroorat Hoti Hai Jo Apna Raham E Maadar Atiyah Kar Sake. Khoon ka Atiyah Karne Me Koi Harj Nahi Hai Kuy Ke Yah Fir Me Badan Me Taiyar Ho Jata Hai Magar Ayse Azw Ka Atiyah Karna Jo Khud Apne Jisam Ki Zaroorat Aur Maslihat Hai(Bagair Zaroorat Aur Maslihat Ke ALLAAH Ne Jisam Me Koi Chiz Nahi Rakhi Hai) Dusre Ko Atiyah Karna Jaiz Hai Is Haal Me Ke Iske Nikalne Se Bade Nuqsaanat Ka Khatrah Ho Balke Aksar Ulma Ne Jisam Ka Koi Bhi Azw Atiyah Karna Jaiz Nahi Qarar Diya Hai,Na Zindagi Me Aur Na Hi Maut Ke Baad Kuy Ke Khoon Ka Atiyah Karne Se Jisam Me Uski Bharpaai Ho Jaati Hai Jab Ke Kisi Bhi Azw Ko Nikalne Se Uski Talaafi Nahi Ho Sakti Aur Is Wajah Se Bhi Ke Yah Musla Ke Zumre Me Hai Jab Ke Kisi Ka Azw Ka Farokhat Karna To Muttafiqah Taur Par Haraam Hai. Cancer Ya Deegar Bimaari Laahiq Hone Ki Wajah Se Nikale Gae Raham E Maadar Ki Paiwand Kaari Me Mufeed Nahi Hai. Laziman Iske Liye Zaroorat Hai Ke Sahat Mando Raham E Maadar Haasil Kiya Jaae Uske Liye Donar Ka Operation Bhi Lazim Hai. Aysa Bhi Mumkin Hai Ke Child Operation Ke Waqt Raham E Maadar Haasil Kiya Jaae. Un Sari Surato Me Raham E Maadar Katna Bagair Zaroorat Me Hai Jo Ke Jaiz Nahi Hoga. Jis Ko Raham E Maadar Chaahiye Uski Zindagi Ko Koi Khatrah Nahi Hai Sirf Husool E Aulaad Ki Khawaish Ke Liye Azw Bandi Hoti Hai Aur Sirf Is Garaz Ki Wajah Se Kisi Zindah Insaan Ka Azw Kaatna Aur Dusre Me Nasab Karna Jaiz Nahi Hoga.
(5) Ek Musalmaan Ka Imaan Ho Ke Aulaad Dene Wala Allaah Hai,Agar Shadi Ke Baad Kuch Saal Aulaad Na Ho To Mayus Nahi Hona Chahiye,Na ALLAAH Par Bharosa Kam Kare. Aulaad Na Hone Ke Natije Me Mazaaro Par Jana,Gairullaah Se Aulaad Kangan,Ta'weez Aur Shirkiya Kaam Karna Ya Fitri Nizaam Me Mudakhilat Karte Hue d
Dusri Aurat Ka Raham Paiwand Karna Sab Tawakkul Ke Khilaaf Hai,Haa Husool E Aulaad Ke Liye Jaiz Asbaab Apnana Bharosa Ke Manafi Nahi Hai.
Hame Sabar Se Kaam Lena Chahiye,Aulaad Ke Husool Ke Liye Allaah Se Dua E Karni Chaahiye, Ilaaj Ki Zaroorat Ho To Mubaah Tariqe Se Ilaaj Karna Chaahiye Aur Allaah Ke Faisle Par Raazi Ho Kar Uski Taraf Se Aulaad Ka Intizaar Karna Chaahiye. Usne Hamare Naseeb Me Aulaad Likh Rakhi Hai To Ek Na Ek Din Zaroor Aulaad Hogi,Lihaza Husool E Aulaad Ke Apna Imaan Barbaad Na Kare. Yaad Rakhe Zindagi Ka Asal Maqsad Bachcha Paida Karna Nahi Hai Aakhirat Ki Tayyari Karni Hai.
(6) Allaah Ne Aurat Ki Sharamgaah Ko Nikaah Ke Zariya Mard Ke Liye Halaal Kiya Hai. Raham E Maadar Sharamgaah Ka Hissa Hai Jaha Ek Shohar Ko Hi Mujamiat Ke Zariya Inzaal Karne Ka Haq Hai Dusri Aurat Ki Bachcha Daani Me Kisi Gair Mard Ka Nutfah Dakhil Karna Sareeh Zina To Nahi Hai Magar Shuba Zina Kehlaae Ga. Jis Tarah Surrogate Mother Hood Na Jaiz Hai Usi Ki Yah Dusri Shakal Hai Ke Surrogasy Me Bhi Miya Biwi Ka Nutfah Dusri Aurat Ke Raham E Maadar Me Hota Hai Aur Raham E Maadar Ki Paiwand Kaari Me Bhi Miya Biwi Ka Nutfa Dusri Aurat Ke Raham Me Hai. Koi Yah Keh Sakta Hai Ke Raham E Maadar Ki Paiwand Kaari Karne Se Ab Yah Us Aurat Ka Azw Ho Gaya Koi Baeed Nahi Kal Yahi Scientists Paidaishi Taur Par Aurat Ki Sharamgaah Na Rakhne Wale Me Kisi Aurat Ki Sharamgaah Set Kar De Kya Us Me Wati Karna Halaal Hoga?
(7) Aaj Kal Hospital Me Blood Bank Ki Tarah Semen Bank Qaaim Hai Jaha Hazaaro Logo Ke Nutfe Munjameed Kar Ke Rakhe Hue Hote Hai Balke Khoon Ki Tarah Mani Atiyah Ki Jati Hai,Ek Shakhas Se Waafir Miqdaar Me Mani Le Kar Kai Kai Nutfe Munjameed Kar Ke Rakhe Jate Hai Aur Fir Un Sare Nutfo Se Kala Hazaaro Ki Jaati Hai. Chaahe Jo Nutfah Jis Mareez Me Fit Ho Jaae Istemaal Kar Liya Jata Hai Maqsad Kaam Chalana Aur Paisa Kamana Hota Hai Yaha Tak Ke Kitne Log Mar Chuke Hote Hai Aur Unka Nutfah Laboratory Me Maujud Hota Hai Zaahir Si Baat Hai Yah Nutfah Kisi Na Kisi Par Istemaal Kiye Jaaen Ge,Is Me Se Muslim Khatoon Bhi Ho Sakti Hai Is Liye Hame Is Chaalbaazi Se Ba Khabar Rehna Hai. Chaalbaazi Ke Alawah Nutfo Me Ikhtilaat Ka Bahut Ahtimaal Hota Hai Kuy Ke Laboratory Test Ke Liye Mani Bahut Pehle Le Li Jaati Hai Aur Ek Muddat Ke Baad Nutfah Taiyar Kar Ke Use Munjameed Kar Ke Nimo Ke Kuch Maraahil Teh Kara Kar Fir Raham E Maadar Me Nasab Kiya Jata Hai. Raham E Maadar Me Der Se Maadah Rakhne Par Ulma Ne Is Taqleeh Se Mana Kiya Hai Kuy Ke Isme Galati Ka Ahtimaal Paya Jata Hai. Semen Bank Haraam Banking Hai. Ek Shakhas Ka Khoon Dusre Kisi Bhi Insaan Me Laga Sakte Hai Magar Mani Ka Mamla Bilkul Bar Akas Hai Miya Biwi Ke Nutfa Ko Baar Aawar Kara Kar Sirf Biwi Ke Raham Me Nasab Kiya Jaae Ga. Ab Aap Gaur Kare Ke Maadah Parasti Ke Taur Me Shohrat,Lalach Aur Rupees Ke Liye Mani Bank Wale Kya Kuch Nahi Kar Sakte Hai?
(8) Is Paiwand Kaari Me Israaf Paya Jata Hai Bagair Kisi Badi Bimari Ya Jaani Khatrah Ke,Us Se Bahut Kam Paiso Me Kisi Ka Bachcha God Le Kar Paal Pos Kar Jawaan Kiya Ja Sakta Hai Aur Kitne Yateem Bachcho Ki Parwarish Ki Ja Sakti Hai Jis Par Nabi SAV Ki Rifaaqat Ka Wada Hai.
(9) Iska Darwaza Kholne Se Haraam Kaari Ke Be Shumaar Darwaze Khulen Ge Maslan Aurto Ki Izzat Ki Paamali,Fitrat Ke Sath Ched Khawani,Haraami Aulaad Ki Afzaish,Gair Fitri Inzaal,Amal E Jaraahi Se Zanana Jaraaseem Ka Husool,Nutfo Me Ikhtilaat,Kasbe Haraam Ki Afra Tafri,Azaae Insaani Ka Karobaar,Raham Maadar Ki Shoqiya Paiwand Kaari Wagairah.
(10) Yah Tariqah Logo Ko Qalaash Banane Haasil Tariqah Se Maal Khane Aur Logo Ki Maishat Tabaah Karne Ka Bahut Bada Hathiyaar Hai Balke Insaani Aaza Ke Smuggling Ka Zariya Hai. Semen Bank Se Manaai,Test & Laboratory Ke Naam Par Lakho Ke Charge,Operation Ka Munh Manga Daam Aur Insaani Aazaa Ki Hitak Aur Ghinaona Karobaar Jaise Kasab Haraam Ke Bahut Sare Hiyle Aur Na Jaiz Umoor Hai. Sirf Ek Case Ka Paisa Ek Yateem Khane Ka Mahino Ka Kharcha Hai.

BANJH PAN KYA HAI?
Insaan Ka Khaaliq Allaah Hai,Usne Apni Hikmat Ke Sath Insaano Ko Achche Dhanche Me Zaroorat Ki Tamam Chize De Kar Paida Farmaya Hai. Qudrat Ne Mard Aur Aurat Ke Milaap Se Afzaish E Nasal Ka Silsila Jari Kiya Hai. Khaaliq Ne Mard Aur Aurat Ka Milaap Sirf Nikaah Ke Saath Halaal Kiya Hai,Bagair Nikaah Ke Milaap Karna Aur Us Se Bachcha Paida Karna Haraam Hai Aysi Aulaad,Aulaaduz Zina Hai. Kabhi Miya Biwi Ke Darmiyan Jinsi Talluqaat Qaaim Hone Ke Bawajud Aulaad Nahi Hoti Yah Banjh Pan Kehlata Hai Afzaish E Nasal Ki Tarah Banjh Pan Bhi Allaah Ki Taraf Se Hai. Surah Shura Ki Mukammal Do Aayat E Padhe,Aulaad Aur Banjh Pan Par Hukam E Rabbani Ho Jaae Ga. Farmaan E Ilaahi Hai:
٤٩. لله ملك السماوات والأرض يخلق ما يشاء يهب لمن يشاء اناسا ويهب لمن يشاء الذكور.
٥٠. أو يزوجهم ذكرانا واناسا ويجعل من يشاء عقيما انه عليم قدير.(Ash Shura)
Tarjumah: Aasmaano Ki Aur Zameen Ki Saltanat Allaah Hi Ke Liye Hai,Woh Jo Chahta Hai Paida Karta Hai Jis Ko Chahta Hai Betiya Deta Hai Jise Chahta Hai Bete Deta Hai Ya Unhe Jama Kar Deta Hai Bete Bhi Aur Betiya Bhi Aur Jise Chaahe Banjh Kar Deta Hai Woh Bade Ilm Wala Aur Kaamil Qudrat Wala Hai.
Allaah Ne Yaha Apni Qudrat Ka Bhi Zikar Kiya Hai Ke Woh Apni Qudrat E Kamila Se Sab Ko Aulaad De Sakta Hai Magar Kabhi Kisi Ko Apni Hikmat Ke Tahat Banjh Bana Deta Hai.
Hame Malum Yah Hua Ke Banjh Pan Allaah Ki Taraf Se Ek Aazmaaish Hai,Is Aazmaaish Par Moamin Ko Sabar Se Kaam Lena Chahiye. Banjh Pan Bimari Bhi Hai Yah Bimari Kabhi Paidaishi Ho Sakti To Kabhi Apne Hatho Ki Kamaai Bhi. Aaj Kal Zina Aam Hai,Sharamgaah Ki Hifazat Nahi Hai,Jab Ek Ladki Zina Karti Fire Gi To Fir Uske Pet Se Jaiz Aulaad Kaise Paida Hogi? Is Haraam Kari Par Allaah Ki Maar Padhti Hai. Is Tarah Yah Gunaah Bhi Aam Hai Ke Shadi Kar Ke Bachche Nahi Paida Karte,Tarah Tarah Ke Muzir Dawaiya Istimal Kar Ke Nasle Insaani Ko Rokte Hai Fir Salo Baad Bachche Ki Khawaish Hoti Hai Kya Aysi Surat Me Qudrat Ki Maar Nahi Padhe Gi? Woh To Aur Bhi Allaah Ke Gusse Ke Shikaar Hon Ge Jo Ladkiyo Ka Isqaat Karati Hai Ya Bila Zaroorat Birth Control Karati Hai.
Paidaishi Taur Par Aadmi Ko Mardana Kamzori Laahiq Ho Ya Aurat Jinsi Masail Ka Shikaar Ho To Jaiz Tariqah Se Ilaaj Karane Me Koi Harj Nahi Hai. Goya Banjh Pan Kabhi Allaah Ki Taraf Se Aazmaaish Ho Sakti Hai Is Par Ek Moamin Se Sabre Jameel Matloob Hai Aur Kabhi Paidaishi Bimari Ho Sakta Hai Uske Liye Jaiz Tariqe Se Ilaaj Karane Me Harj Nahi Aur Kabhi Yah Qudrat Ki Maar Ho Sakti Hai Uske Liye Sachche Dil Se Taubah Karna Chahiye Aur Jaiz Asbaab Apna Kar Husool E Aulaad Ke Liye Apne Rab Se Sachche Dil Se Dua Karni Chahiye.

JISE AULAAD NA HO RAHI HO WOH KYA KARE?
Allaah Ne Apne Tamam Bandi Ke Sath Insaaf Kiya Hai,Uske Sath Bhi Insaaf Kiya Jis Ko Aulaad Di Aur Uske Sath Bhi Insaaf Hi Hai Jise Aulaad Nahi Di Is Liye Aulaad Na Hone Se Imaan Aur Bharosa Aur Nek Amal Se Mutassir Na Ho. Har Haal Me Allaah Ki Taarif Baja Laae,Allaah Ne Moamino Ko Namaaz Aur Sabar Ke Zariya Madad Mangne Ki Takin Di Hai. Yaqeen Jane Jab Allaah Koi Nemat Chhin Leta Hai Aur Moamin Us Par Sabar Se Kaam Leta Hai To Apne Rab Ki Taraf Se Bade Ajar Ka Mustahiq Hota Hai. Ham Kasrat Se Allaah Ki Ibaadat Kare Aur Nek Aulaad Ke Liye Us Se Aajizi Ke Sath Girya Wazaari Karte Hue Dua Kare. Mard Ko Dusri Shadi Ki Taqat Ho To Aulaad Na Hone Par Dusri Shadi Kar Leni Chahiye. Dusri Shadi Karna Mushkil Ho To Apne Nasbi Ya Razaai Ya Sasuraali Rishta Daro Me Jis Ke Paas Ziyada Aulaad Ho Un Se Ek Bachcha Maang Kar Le Palak Bana Le,Ek Taraf Aap Ko Apne Rishte Daar Ki Aulaad God Lene Se Khushi Hogi To Dusri Taraf Aulaad Ki Aarzu Puri Hogi. Apne Dilo Ko Aulaad Ka Sukoon Dilane Ke Liye Apne Samaaj Me Maujud Yateem,Bewaao Aur Miskino Ke Bachcho Ki Kifaalat Kare,Us Par Allaah Ki Taraf Se Bada Ajar Mile Ga Sath Hi Sath Allaah Ki Likhi Taqdeer Par Raazi Aur Khush Ho Kar Un Logo Me Gaur Aur Fikar Kare Jinhe Allaah Ne Aap Se Ziyada Aazmaaish Me Mubtila Kiya Hai Yaha Tak Ke Allaah Ne Bohto Ko Aulaad De Kar Badi Badi Aazmaaish Me Mubtila Kiya Hai.

AAKHRI PAIGAAM AUR MUSLIM ATIBBA KO NASIHAT:
Aap Allaah Par Aur Uske Rasool Par Imaan Laate Hai To Unke Ahkaam Par bhi Chalna Padhe Ga Tibb Ka Paisha Sirf Duniya Parasti Ke Liye Hargiz Nahi Apnaae. Is Ilm Ke Zariya Jaha Qaum E Millat Ki Khidmat Kare Wahi Ilaaj Aur Mualija Ke Baab Me Ahle Ilm Se Halaal Aur Haraam Ki Pehle Jankaari Hasil Kare Fir Mubaah Tariqe Se Bimaaro Ka Ilaaj Kare. Yaqeenan Bahut Sare Halat Aap Ke Paas Ayse Aate Honge Jaha Ek Haraam Kaam Karne Se Lakho Rupees Mil Jaae Ge Magar Aysi Haraam Kamai Se Parhez Kare Allaah Ke Samne Paishgi Hogi Aur Apne Kae Ka Mukammal Hisaab Dena Hoga. Jaan Le Yah Duniya Aur Uski Lazzat Aur Shashwat Faani Aur Lamha Bhar Ki Hai Jab Ke Uska Anjaam Bhayanak Aur Der Paa Hai. Dusri Baat Yah Hai Ke Banjh Pan Aaj Ka Bada Challenge Nahi Hai Balke Yah Challenge Yah Hai Ke Jin Wajuhaat Par Aurto Me Banjh Pan Phail Raha Hai Ya Phailaya Ja Raha Hai Unka Sadde Baab Kiya Jaae. Sadko,Hospital Station Aur Dustbeen Me Zindah Bachche Phainke Jate Hai,Senkdo Ki Tadad Me Chote Chote Masum Bachche Mazduri Karne Par Majboor Hai Hazaro Ki Tadad Me Yateem Khane Me Maut Aur Zindagi Ki Kashmakash Me Pal Rahe Hai,Lakho Ki Tadad Me Bachchiya Tawaaif Ban Rahi Hai Un Tamam Bachcho Ka Hal Talash Kiya Jaae Bila Zaroorat Sirf Rupees Ke Lalach Me Aksar Aurte Ka Child Operation Kar Diya Jata Hai Fir 2 Se 3 Bachcho Ke Baad Khatrah Bata Kar Raham E Maadar Nikaal Diya Jata Hai Us Par Control Kiya Jaae.
Zaroorat Mando Bachcho Ki Kasrat Paidaish Par Unki Kifaalt Aur Parwarish Ka Intizaam Aur Mohtaaj Bachchiyo Ki Shadi Par Mukammal Imdaad Hukoomati Satah Par Farahim Ki Jaae. Paise Ki Adam Maujudgi Ki Wajah Se Jo Bachchiya Gharo Me Jawaan Ho Rahi Ya Zina Ka Rasta Ikhtiyaar Kar Rahi Hai Ya Khud Kushi Kar Rahi Unki Zindagiya Bachaai Jaae. Yah Hai Hamari Samaji Challenge,Unhe Nazar Andaaz Kar Ke Gair Zaroori Kamo Par Tavjjoh Di Ja Rahi Balke Fitri Nizaam Ke Sath Khilwaad Kiya Ja Raha Hai Ise Band Hona Chaahiye.
Allaah Hame Qawi Taqwah Ikhtiyaar Karne Ki Taufiq De Aur Apni Taufiq Se Imaan Aur Amal E Saleh Par Hamesha Gamzan Rakhe Aur Siraat E Mutaqeem Par Khatma Farmaae.
 
Top